اسرائیل اوردوسی حزبالله گه تېگیشلی قورال ایشلب چیقریش جایی و انبارلرگه هجوم قیلگنینی ایتدی
بوگون (جمعه، ۱۹ جدی) اعلان قیلینگن اسرائیل اوردوسی بیاناتیده ایتیلیشیچه، اسرائیل گه قرشی «تروریستیک فتنهلرنی عملگه آشیریش» اوچون فایدهلنیلگن اوچیریش میدانچهلری، اوچیرگیچلر و حربي بنالر هم هجومگه اوچرهگن.
اسرائیل اوردوسی نینگ بیلدیریشیچه، حزب الله نینگ اوشبو جایلردهگی «قَیته تیکلش فعالیتی» اسرائیل و لبنان اۉرتهسیدهگی کېلیشوولرگه ضد بۉلیب، اسرائیل دولتی اوچون تهدید حسابلنهدی.
اسرائیل اوردوسی هجوملر لبنان نینگ قَیسی حدودلریده عملگه آشیریلگنینی انیق ایتمهگن، بیراق الجزیره خبریگه کۉره، اسرائیل اوردوسی لبنان جَنوبی و شرقیدهگی حدودلرنی نشانگه آلگن.
بو هجوملر لبنان حکومتی نینگ حزب الله نی قورالسیزلنتیریش بۉییچه اورینیشلری حاضرچه موفقیتسیز بۉلگنیدن کېین عملگه آشیریلگن.
اسرائیل نینگ سۉنگگی هجوملری، شونینگدېک، ایران تشقی ایشلر وزیری عباس عراقچی نینگ لبنانگه سفری و او یېرده رسميلر بیلن اوچرهشووی بیلن بیر پیتگه تۉغری کېلدی.
ایران حزب الله لبنان نینگ اساسي حاميلریدن بیری حسابلنهدی و اسرائیل بو دولتنی حزب الله گه قورال و حربي تخنیک یېتکزیب بېریشده عیبلب کېلهدی.
