سکّیزته عرب و اسلامي دولت غزهدهگی انسانپرورلیک احوال کېسکین یامانلشهیاتگنیدن خواطر بیلدیریب، قۉشمه بیانات آرقهلی اوشبو منطقهگه یاردملرنینگ تېزلیک بیلن کیریتیلیشینی طلب قیلدی.
مذکور بیانات قطر، اردن، بیرلشگن عرب امیرلیکلری، اندونیزیا، پاکستان، تورکيه، سعوديه عربستانی و مصر تشقی ایشلر وزیرلری تامانیدن اعلان قیلینگن.
اولر کوچلی یامغیر و بۉرانلر کبی آغیر آب-هوا شرایطلری، انسانپرورلیک یاردم کیریشیگه قۉییلگن چېکلاولرنینگ دوام اېتیشی همده ضروري احتیاج بویوملرینینگ کېسکین تنقیصلیگی غزهدهگی قریب 1،9 میلیون کیشی و کۉچیریلگن عایلهلر اوچون موجود انساني وضعیتنی ینه-ده آغیرلشتیرگنینی ایتیشدی.
بو دولتلر اسراییلدن نادولت و خلق ارا تشکیلاتلرگه غزه و غربي ساحلده برقرار و چېکلاولرسیز فعالیت یوریتیشیگه رخصت بېریشنی طلب قیلدی.
سکّیز عرب و اسلامي دولت خلق ارا همجعیتنی اۉزینینگ حقوقي و اخلاقي مسوولیتلرینی ادا اېتیشگه چقیریب، اسراییلگه یاردملرنینگ کیریشی و تقسیملنیشیگه قۉییلگن برچه چېکلاولرنی تېزلیک بیلن بېکار قیلیش اوچون باسیم اۉتکزیشنی سۉرهدی.
اوشبو مملکتلر تشقی ایشلر وزیرلری بیرلشگن ملتلر تشکیلاتی و اونینگ ادارهلری آرقهلی، هېچ بیر تاماننینگ ارهلشوویسیز، غزه سکتوریگه بشری یاردملرنینگ درحال، تۉلیق و تۉسقینلیکسیز کیریتیلیشینی و شفاخانهلرنی قَیته تیکلشنی همده رفع چېگره اۉتیش یۉلی قَیته آچیشنی طلب قیلدی.
اوروش عاقبتیده غزهدهگی زیرساختنینگ کتّه قِسمی ویران بۉلگن و فلسطینلیکلر آغیر یشش شرایطلریگه دوچ کېلماقده.
خلق ارا مهاجرت تشکیلاتی معلوماتیگه کۉره، کوچلی یامغیرلر سببلی یوز مینگلب کۉچیریلگن فلسطینلیکلر چادرلر و وقتینچهلیک باشپناهلریده سوو تاشقینلریگه دوچ کېلماقده.
