امریکا جمهور رییسی دونالد ترامپ، ایراندهگی ناراضیلیک نمایشلریگه مناسبت بیلدیریب، اگر ایران حکومتی نمایشچیلرگه اۉق اوزسه، امریکا قۉشمه ایالتلری اولرنی قوتقریشگه کېلیشینی ایتدی.
او بوگون (جمعه، ۱۲ جدی) ایکس اجتماعی ترماغیده یازگن پیامیده «اگر ایران تینچ نمایشچیلرگه قرهته اۉق اوزسه و اولرنی زۉروانلیک بیلن اۉلدیرسه، بو اولر نینگ عادتی امریکا قۉشمه ایالتلری اولرنی قوتقریشگه تیارلیگینی اظهار قیلگن.
ایران جاري هفته نینگ باشیدن بویان دالر نرخی نینگ آشیشی و قیمتچیلیککه قرشی گواه بۉلهیاتگن ناراضیلیکلرگه صحنه بۉلماقده.
خبرلرگه کۉره، اَیریم منطقهلرده بو ناراضیلیکلر زۉروانلیککه ایلنیب کېتگن.
ایران نینگ دولتگه قرهشلی یېتکرمهلری کېچه لورستان ولایتی نینگ ازنا شهریده پولیس بناسیگه هجوم اویوشتیریلگنی، نتیجهده اوچ کیشی هلاک بۉلگنی و ینه۱۷کیشی یرهلنگنی حقیده خبر بېرگن.
فارس اخبارات آژانسینینگریازیشیچه، «بیر گروه ترتیبسیزلیک چیقرووچیلر ازنا شهریدهگی خلق نینگ ناراضیلیک ییغینیدن سوءاستعمال قیلیب، پولیس بناسیگه باستیریب کیرگن و خادملرنی قورالسیزلنتیریش همده قورال انباریگه هجوم قیلیش مقصدیده ساووق و اۉقاتر قوراللر بیلن هجوم قیلگن»
بیراق هرانا سایتی ناراضیلیکلر دوامیده خوفسیزلیک کوچلری نمایشچیلرگه قرهته اۉق اوزگنینی یازماقده.
انسان حقوقلری فعاللری سایتی بۉلگن هرانا اخبارات آژانسینینگ یازیشیچه، ایرانده ناراضیلیکلر و اقتصادي ایش تشلشلرنینگ دستلبکی بېش کونیده کمیده۱۱۹ کیشی حبسگه آلینگن، یېتّی کیشی هلاک بۉلگن همده کمیده۳۳کیشی یرهلنگن.
اوشبو سایتگه کۉره، تهراندن باشلنگن ناراضیلیکلر کمیده۳۲ ته شهرگه، ایران نینگ تورلی ولایتلریگه یاییلگن.
