اوکراین جمهور رییسی ولودیمیر زلنسکی بو مملکتنینگ امریکا بیلن میامیده بۉلیب اۉتگن سۉنگگی مذاکرهلریده اوکراین و روسيه اۉرتهسیدهگی اوروشنی توگهتیش اوچون۲۰ بنددن عبارت رېجه تیارلنگنینی ایتدی.
رویترز خبریگه کۉره، زلنسکی بوگون (چارشنبه، ۳جدی) اوشبو رېجه ماسکوگه یوباریلگنینی و روسيه رسميلری اونی کۉریب چیقهیاتگنینی معلوم قیلدی.
اوکراین جمهور رییسی ولودیمیر زلنسکی اوشبو رېجهده اوروش توگهگنیدن کېین مملکت خوفسیزلیگینی تأمینلش اوچون مستحکم کفالتلر نظرده توتیلگنینی قۉشیمچه قیلدی.
شو بیلن بیرگه، او روسيه تامانیدن باسیب آلینگن اوکراین حدودلری بیلن باغلیق مسألهلر حلی هم حل اېتیلمهگنینی ایتدی.
زلنسکی بو نازک مسألهلر یوزهسیدن مذاکره آلیب باریش اوچون امریکا جمهور رییسی دونالد ترامپ بیلن اوچرهشیشنی ایستهیاتگنینی بیلدیردی.
اوّلراق، اَیریم خلق ارا یېتکرمهلر دونالد ترامپ اوروشنی توگهتیش عوضیگه اوکراین حدودلرینینگ بیر قِسمینی روسيهگه تاپشیریشگه راضی اېکنینی خبر قیلگن اېدی.
ولودیمیر زلنسکی بو تکلیفگه قطعي قرشی چیقیب، اوکراین اۉز حدودلریدن واز کېچیشگه تیار اېمسلیگینی تأکیدلهدی.
روسيه ۲۰۲۲-ییل فبروری آییده اوکراینگه باستیریب کیرگن و اۉشندن بویان ایکّی دولت اۉرتهسیدهگی اوروش دوام اېتماقده.
دونالد ترامپ امریکا جمهور رییسی صفتیده آق اویگه قَیته کیرگنیدن سۉنگ بیر نېچه بار اوشبو اوروشنی توگهته آلیشینی دعوا قیلگن، بیراق حاضرگچه اونینگ اورینیشلری موفقیتلی بۉلمهگن.
