امریکا جمهور رییسی دونالد ترامپ، نیویارک شهری شاروالی زَهران ممدانی، اونی حیرتگه سالگنینی ایتگن.
اۉتگن دورلرده بیر- بیریگه هجوم قیلیب کېلگن بو ایکّی شخص کېچه آق اویده صمیمي اوچرهشوو اۉتکزیشدی. اوشبو اوچرهشوو امریکا عامهوي اخبارات واسطهلریده کېنگ یاریتیلگن.
ترامپنینگ ایتیشیچه، ممدانی اونی «حقیقتاً حیرتگه سالگن» و اولر جنایتچیلیک همده اوی-جای مسألهلری بۉییچه بیر خیل فکرگه اېگه اېکنلر.
امریکا جمهور رییسی، «اونینگ اَیریم غایهلری عیناً مېن ایلگری سورهیاتگن غایهلر نینگ اۉزیدیر… بیز اۉیلهگنیمدن انچه کۉپ مسألهده کېلیشرکنمیز.»
ترامپ ممدانینی «نیویارک اوچون کتّه ایش قیلیش صلاحیتیگه اېگه غیر متعارف سیاسي شخص» صفتیده تعریفلهگن.
اونینگ ایتیشیچه: «او اَیریم محافظهکارلرنی همده جوده لیبرال آدملرنی هم حیرتده قالدیرهدی.»
ممدانی اېسه کېچهگی اوچرهشوونی ثمرهلی دېب اتهگن و ترامپ بیلن «کېلیشماوچیلیکلر اېمس، بلکه عمومي جهتلر» حقیده گپلشگنینی ایتگن.
آق اوی ییغیلیشی چاغیده ژورنالیستلر ترامپ بیلن ممدانی اۉرتهسیدهگی اۉتگن کېسکین تارتیشوولرگه مراجعت قیلیشدی؛ بیراق ایکّی تامان هم بو سواللرگه ماهرلیک بیلن جواب بېریشدی.
اعتبارگه مالک بیر لحظهده ترامپ شوندهی دېگن: «اگر او مېنی فاشیست دېسه هم، هېچقیسی یۉق.» بو، نیویارک شاروالی اونی عامه آلدیده اتهگن عباره نینگ اۉزی. بیر ژورنالیست ممدانیدن سۉرهدی: «جناب ممدانی، نیویارک شهری جمهور رییس ترامپنی یخشی کۉرهدیمی؟» ممدانی سوالدن قاچیب، شوندهی دېدی: «نیویارک شهری صرفهگه یقین مقرون کېلهجکنی یخشی کۉرهدی.»
«سیزگه شونی ایته آلهمنکی، یقینده بۉلیب اۉتگن جمهور رییسلیک سیلاویده کۉپراق نیویارکلیکلر یشش خرجتلری مسألهسیگه اعتبار قرهتیلگنی اوچون جمهور رییس ترامپگه آواز بېریشدی. و مېن بو صرفهگه مقرون حیاتی دستورینی عملگه آشیریش اوچون همکارلیککه تیارمن.» دېب ایتدی او.
اوچرهشوو دوامیده ترامپ و ممدانی یشش خرجتلرینی کمهیتیریش بۉییچه عمومي مقصدلری بارلیگینی قیته-قیته تأکیدلشدی و کۉپلب کېلیشماوچیلیکلرنی ایکّینچی اۉرینگه قۉییب، دقّتنی شو موضوعگه قرهتیشدی.
ممدانی، «جمهور رییس حقیده مېن حقیقتاً قدرلهیدیگن نرسه بیز اۉتکزگن اوچرهشووده کۉپلب کېلیشماوچیلیکلرگه اېمس، بلکه نیویارکلیکلرگه خدمت قیلیش بۉییچه عمومي مقصدیمیزگه اعتبار قرهتیلگنیدیر.» دېیه قۉشیمچه قیلدی.
اونینگ تاکیدلهشیچه، «راستینی ایتسم، بو حاضر یشش خرجتلری انقراضی بیلن کورهشهیاتگن سکّیز یریم میلیون آدم نینگ حیاتینی، هر تۉرت کیشیدن بیری قشّاقلیکده یشهیاتگن شرایطنی اۉزگرتیریب یوباریشی ممکن.»
ممدانی نیویارک شهرینینگ بیرینچی مسلمان شاروالی حسابلنهدی. ۳۴ دیموکرات سیاستچی ممدانی نیویارک تاریخیدهگی ایلک مسلمان شاروال دیر. سیلاو کمپاینی دوامیده او سوسیالیستیک شعارلرنی ایلگری سورگن، ترامپ اېسه اونی کېچهگچه «کمونیست» دېب اتهب کېلگن.
ترامپ حتا ممدانی غلبه قازانسه، نیویارک شهردارلیگیگه اجرهتیلهدیگن فدرال بودجهنی قیسقرتیریش بیلن تهدید قیلگن اېدی؛ بیراق کېچهگی اوچرهشووده بو موضوعنی هم کیچیک اهمیتلی مسأله صفتیده کۉرستدی.
