هند پولیسینینگ معلوم قیلیشیچه، فریدآبادده تاپیلگن پارتلاوچی مادّهلر نمونهلر آلینهیاتگن پیتده هند باشقروویدهگی کشمیرنینگ نوگام پولیس بېکتیده تصادفن پارتلش یوز بېرگن.
اوشبو پارتلش جمعه کونی کېچقورون یوز بېریب، تۉقّیز کیشی اۉلگن و۳۰ دن آرتیق کیشی اېسه یرهلنگن.
هندوستان تایمیز خبریگه کۉره، جاموو کشمیر پولیسینینگ باش مدیری نالین پربات بو حادثهنینگ سببینی تاپیلگن پارتلاوچی مادّهلرینینگ «تصادفي پارتلشی» دېب اتهگن.
اونینگ ایتیشیچه۹ و ۱۰ نوامبر کونلری فریدآباددن تاپیلگن کتّه مقداردهگی پارتلاوچی مادّهلر و کیمیاوي ماتریاللر جاموو کشمیرگه آلیب کېلینیب، نوگام پولیس بېکتینینگ آچیق میدانیده خوفسیز طرزده سقلنهیاتگن اېدی.
اونینگ سۉزلریگه کۉره، تېکشیروو گروهی سۉنگّی ایکّی کون دوامیده پارتلاوچی مادّهلردن نمونه آلهیاتگن بۉلگن و ایش «یوقاری احتیاطکارلیک» بیلن آلیب باریلهیاتگن اېدی، اما «افسوسکی، ساعت۱۱:۲۰ ده پارتلش یوز بېردی».
نالین پرباتنینگ ایتیشیچه، پارتلش عاقبتیده نوگام پولیس بۉلیمینینگ بناسی «جدّي شکستلنگن» همده حتی یقین اطرافدهگی بنالرگه هم ضرر یېتگن.
بو پارتلش بیر نېچه کون ایلگری ینگی دهلیدهگی قیزیل قلعه یقینیده صادر بۉلگن پارتلشدن کېین رۉی بېردی. اۉشه حادثهده کمیده۱۰ کیشی هلاک بۉلگن و کېنگ کۉلملی تېرگاو باشلنگندی.
تدقیقاتچیلر کېینچهلیک، پارتلهتیلگن موترنی باشقرگن شخص عمر النبی، جاموو کشمیرنینگ پولواما منطقهسیدن بۉلگن داکتر اېدی دېدیلر.
هند عامهوي اخبارات واسطهلری نینگ یازیشیچه، اوشبو پارتلش بۉییچه تېرگاو کشمیر نینگ فریدآباد منطقهسیده کتّه مقدارده پارتلاوچی مادّهلرنینگ تاپیلیشیگه آلیب کېلگن.
