امریکا جمهور رییسی دونالد ترامپ دوشنبه کونی سوريهنینگ مؤقت جمهور رییسی احمد شرع بیلن تاریخي مذاکرهلردن سۉنگ، سوريه موفقیتی اوچون قۉلیدن کېلگن برچه ایشنی قیلیشگه وعده بېردی.
شرع یقینده امریکا تامانیدن «خارجي ترورچی» صفتیده چېکلاوگه اوچرهگن اېدی و اونینگ باشیگه 10 میلیون دالرلیک مکافات قۉییلگن اېدی. او دوشنبه کونی آق اویده ترامپ بیلن یاپیق اېشیکلر آرتیده اوچرهشدی.
رویترز خبر آژانسینینگ خبریگه کۉره، شرع نی آق اویده کوتیب آلیش عادتدهگیدن غیر عادي و ساکن طرزده اۉتدی، او عادتده خارجی رهبرلر اوچون تشکیل اېتیلهدیگن دبدبهلی مراسمسیز کیردی.
ترامپ ژورنالیستلر بیلن صحبتده شرع نی «کوچلی یېتکچی» دېب اتهدی و اونگه ایشانچ بیلدیردی. ترامپ «بیز سوريهنینگ موفقیتی اوچون قۉلیمیزدن کېلگن همه ایشنی قیلهمیز.» دېب وعده بېردی.
بیراق ترامپ شرع نینگ بحثلی اۉتمیشینی هم تیلگه آلدی و دېدی: «همهمیز نینگ آغیر اۉتمیشیمیز بۉلگن.»
شرع نینگ واشنگتنگه تشریفینینگ اساسي مقصدلریدن بیری امریکانینگ اېنگ قتّيق چېکلاولرینی تۉلیق بېکار قیلیشگه اېریشیش اېدی.
او ترامپ بیلن یاپیق اېشیکلر آرتیده اوچرهشهیاتگن پیتده، امریکا مالیه وزیرلیگی « قیصر» دېب اتهلگن چېکلاولرنی۱۸۰ کونگه اوزهیتیرگنینی اعلان قیلدی، بیراق بو چېکلاولرنی تۉلیق بېکار قیلیش فقط امریکا کانگرسی نینگ صلاحیتیگه کیرهدی.
