پاکستان یېتکرمهلری خبرلریگه کۉره، خیبرپختونخوا ایالتی نینگ بنو اولسواللیگیده کېتمه-کېت یوز بېرگن ایکّی پارتلش عاقبتیده کمیده ۷ کیشی اۉلگن ینه 3 کیشی یرهلنگن.
دینیوز معلوماتیگه کۉره، پارتلشلر بوگون (شنبه،۳۰ جوزا) بنو اولسواللیگی نینگ «مرکا بیرا» منطقهسیده یوز بېرگن.
رسمي منبعلرگه تهیهنیب بېریلگن خبرده ایتیلیشیچه، بیرینچی پارتلشده هاتی خیل قیشلاغیدن بنو تامان کېتهیاتگن یۉلاوچی موتر یۉل چېتیگه قۉییلگن ماینگه اوریلیب پارتلهگن و۵ کیشی جان بېرگن.
شوندن سۉنگ، آرهدن قیسقه وقت اۉتیب، عینِ جایده ایکّینچی پارتلش صادر بۉلگن. بو پارتلشده بیرینچی حادثه قربانلریگه یاردم بېرهیاتگن ایکّی کیشی هلاک بۉلگن و ینه بیر موتر ضرر کۉرگن.
دینیوز یازیشیچه، اوشبو ایکّی پارتلشده جمعی۳ کیشی جراحت آلگن.
حاضرچه هېچ بیر گروه بو هجوملر اوچون جوابگرلیکنی اۉز ذمّهسیگه آلمهگن.
خیبر-ختونخوا باش وزیری سهیل افریدی اوشبو پارتلشلرنی قارهلب، قربانلر عایلهلریگه همدردلیک بیلدیرگن.
محلي حاکمیت وکیللری واقعه یوزهسیدن تېرگاو باشلنگنینی معلوم قیلگن.
خیبر-پختونخوا پاکستان نینگ افغانستان بیلن چېگرهداش اېنگ ناتینچ حدودلریدن بیری حسابلنهدی. سۉنگی ییللرده بو حدودده خوفسیزلیک حالتی سېزیلرلی درجهده یامانلشگن.
پاکستان حکومتی کۉپلب بوندهی هجوملرده «تحرک-طالبان پاکستان (تیتیپی)»نی عیبلب کېلهدی و بو گروه افغانستان حدودیدن فایدهلنیب هجوملر اویوشتیرهیاتگنینی دعوا قیلهدی.
