فرانسهنینگ «اویان» شهریده اۉتگن جی۷ییغینیده یېتّی ییریک اقتصادي دولت رهبرلری ایران و امریکا اۉرتهسیده اوروشنی یکونلشگه قرهتیلگن کېلیشوونی آلقیشلهدی همده اونی عملگه آشیریشده همکارلیک قیلیشگه تیار اېکنلیکلرینی بیلدیردی.
قۉشمه بیاناتده جی۷ یېتکچیلری بۉلهجک مذاکرهلر ایران نینگ منطقوي و خلق ارا خوفسیزلیککه عاید فعالیتلرینی هم قمرهب آلیشی، شونینگدېک ایران هېچ قچان هسته قورالیگه اېگه بۉلمسلیگینی کفالتلشی کېرهکلیگینی تأکیدلهدیلر.
شونینگدېک، اولر انرژی تأمیناتی یۉنهلیشلرینی دیوېرسیفیکهتسيه قیلیش، هرمز بۉغازیگه قرهملیکنی کمهیتیریش و انرژی ذخیرهلرینی آشیریش مجبوريتینی هم آلگن.
جی7 بیاناتیده لبنانده زودلیک بیلن ثمرهلی اۉت آچیشنی تۉختهتیش همده حزبالله نی قورالسیزلنتیریش چقیریغی هم ایلگری سوریلگن.
امریکا و ایران اوشبو هفته باشیده اوروشنی توگهتیش و ینگی مذاکرهلرنی باشلش بۉییچه دستلبکی کېلیشووگه اېریشگنینی اعلان قیلگن اېدی. رویترز خبریگه کۉره، کېلیشوو یقین کونلرده رسمي شکلده تقدیم اېتیلیشی کوتیلماقده.
کېلیشوو تفصیلاتلری نینگ کتّه قِسمی حاضرچه آشکار قیلینمهگن بۉلسه-ده، امریکا جمهور رییسی دونالد ترامپ حجتده ایران هسته قورالیگه اېگه بۉلمسلیگی انیق قید اېتیلگنینی ایتگن.
