اروپانینگ تۉرتته قدرتلی دولتی رهبرلری ایران و امریکا اۉرتهسیدهگی کېلیشووگه مناسبت بیلدیریب، ایران هسته دستوری بۉییچه انیق و تېکشیریلیشی ممکن بۉلگن قدملر تشلهگن تقدیرده، تهرانگه قرشی جاري اېتیلگن چېکلاولرنی بېکار قیلیشگه تیار اېکنلیکلرینی معلوم قیلدیلر.
بوگون الیزه سرایی فرانسه جمهور رییسی امانوئل مکرون، بویوک بریتانیا باش وزیری کییر استارمر، آلمان باش وزیری فریېدریچ مېرز و ایتالیا باش وزیری جورجا ملونی نینگ قۉشمه بیاناتینی نشر قیلیندی.
بیاناتده شوندهی دېییلهدی: «بیز ایراننینگ هسته دستوری بۉییچه انیق و تېکشیریلیشی ممکن بۉلگن قدملریگه جوابن تېگیشلی چېکلاولرنی بېکار قیلیشگه تیارمیز.»
تۉرت دولت رهبرلری اوشبو جریاننی سقلب قالیش و اوزاق مدتلی دیپلوماتیک کېلیشووگه اېریشیش اوچون همکارلیک قیلیشگه تیار اېکنلیکلرینی تأکیدلهدیلر.
اولر: «ایران هېچ قچان هسته قورالیگه اېگه بۉلمسلیگی کېرهک. بیز بو مقصد یۉلیده امریکا، ایران و خلقارا اتوم انرژیسی اگېنتلیگی بیلن همکارلیک قیلیشگه تیارمیز»، دېب بیلدیردیلر.
اروپا رهبرلری هرمز بۉغازی نینگ زودلیک بیلن آچیلیشی و دېنگیز قتناوی نینگ هېچ قندهی چېکلاولرسیز تیکلنیشینی ضرور دېب بهالب، تجاري کېمهلر حرکتی خوفسیزلیگینی تأمینلش همده ماینلردن تازهلش ایشلرینی عملگه آشیریش اوچون «تۉلیق مدافعه کرکتریدهگی و مستقل ماموریت» آرقهلی اوشبو جریانده اشتراک اېتیشگه صادق اېکنلیکلرینی معلوم قیلدیلر.
بویوک بریتانیا و فرانسه سۉنگی ایکّی آی دوامیده یقین شرق خلقارا سوولریده، جملهدن هرمز بۉغازیده تجاري کېمهلر قتناوی خوفسیزلیگینی تأمینلش اوچون گلوبل ائتلاف توزیشگه حرکت قیلگن.
شونینگدېک، بویوک بریتانيا و فرانسه منطقهگه حربي کېمهلرنی هم یوبارگن، بیراق حاضرچه اولر هېچ قندهی حربي عملیاتده اشتراک اېتمهگن.
