ایران و امریکا ایکّی دولت اۉرتهسیدهگی کېلیشوو یکونلنگنینی رسماً تصدیقلهدی همده او کېلهسی جمعه کونی (۲۹جوزا) بۉلیب اۉتهدیگن رسمي مراسمده امضالنیشینی معلوم قیلدی.
امریکا جمهور رییسی دونالد ترامپ بوگون (دوشنبه،۲۵ جوزا) تروثسوشیال ترماغیده یازیشیچه، ایران بیلن کېلیشوو تۉلیق یکونلنگن و بونینگ نتیجهسیده هرمز بۉغازی قَیته آچیلیب، ایرانگه نسبتاً دېنگیز قملی بېکار قیلینهدی.
ترامپ شوندهی یازدی: «ایران اسلام جمهوریتی بیلن کېلیشوو اېندی تۉلیق یکونلندی. برچهنی تبریکلهیمن! شو بیلن هرمز بۉغازینی باج-تۉلاولرسیز تۉلیق آچیشگه رخصت بېرهمن و عینِ پیتده امریکا نینگ ایرانگه قرشی دېنگیز قملینی درحال بېکار قیلیشگه فرمان بېرهمن.»
او ینه قۉشیمچه قیلدی: «دنیا کېمهلری، موتورلرینگیزنی ایشگه توشیرینگ، نفت آقیمی قَیته باشلنسین.»
ترامپ باشقه بیر خبریده کېلیشوو جمعه کونی امضالنیشینی معلوم قیلگن. ایران نینگ عالي ملي خوفسیزلیک کېنگشی هم ایکّی دولت اۉرتهسیدهگی میموراندوم نینگ رسمي امضالنیش سنهسی صفتیده عیناً شو کوننی تصدیقلهدی.
اونینگ ایتیشیچه، «جمعه کونگی امضادن سۉنگ هرمز بۉغازی آچیلهدی و ماینلردن تازهلش ایشلری آلیب باریلگچ، نفت ینه هر ایکّی تاماندن منطقه همده دنیا بازارلریگه آقیب بارهدی.»
امریکا جمهو رییسی اوشبو «بویوک کېلیشوو» بوتون منطقهگه تینچلیک و خوفسیزلیک آلیب کېلیشیگه امید بیلدیردی.
ترامپگه کۉره، «کۉپلب جمهور رییسلر ایران بیلن تینچلیک اۉرنهتیشگه اورینگن، اما مېندن آلدین اولر نینگ برچهسی موفقیتسیزلیککه اوچرهگن. منطقه رهبرلری ایلک بار اولرگه حقیقي تینچلیککه اېریشیشده یاردم بېره آلهدیگن جمهور رییسنی تاپدیلر.»
ایران عالي ملي خوفسیزلیک کېنگشی کاتبی هم «ایران و امریکا اۉرتهسیدهگی اوروشنی یکونلش بۉییچه کېلیشوو»نی تصدیقلهدی.
کېنگش بوگون تانگده اعلان قیلگن بیاناتیده، تامانلر برچه جبههلرده، جملهدن لبنانده هم اوروش و حربي عملیاتلرنی بوگون کېچهدن باشلب درحال و دایمي روشده تۉختهتیشگه، شونینگدېک ایرانگه قرشی دېنگیز قملینی زودلیک بیلن و تۉلیق بېکار قیلیشگه کېلیشیب آلگنینی بیلدیردی.
کېنگش نینگ معلوم قیلیشیچه، «اوروشنی یکونلش بۉییچه مذاکرهلر کېلیشوو متنی»۲۴ جوزا آقشامیده یکونلنگن.
آق اوی حاضرچه اېریشیلگن کېلیشوو تفصیلاتلرینی اعلان قیلمهگن.
ایران عالي ملي خوفسیزلیک کېنگشی هم امریکا حکومتی کبی کېلیشوو نینگ انیق مضمونینی آشکار قیلمهگن و «یکوني بیتیم» بۉییچه مذاکرهلر کېلیشووده کۉزده توتیلگن مجبوريتلر بجریلگندن کېین دوام اېتتیریلیشینی بیلدیرگن.
ایران اوشبو کېلیشووگه اېریشیشده واسطهچیلیک قیلگن پاکستان و قطرگه منّتدارلیک اظهار اېتدی.
