اسرایلنینگ لبنان پایتختی بیروتدهگی ضاحیه حدودیگه اویوشتیرگن هجومیدن سۉنگ، ایران پارلمانی رئیسی و مذاکرهلر هیاتی رهبری محمد باقیر قالیباف اوشبو هجوم «امریکا اۉز مجبوريتلرینی بجریشگه یا اراده، یا صلاحیتگه اېگه اېمسلیگینی ینه بیر بار کۉرستدی»، دېدی.
ایران پارلمانی رئیسی بوگون (یکشنبه، ۲۴ جوزا) ایکس اجتماعي ترماغیده شوندهی یازدی: «رژیمگه یشیل چیراق یاقیب بېریش آرقهلی امتیاز قۉلگه کیریته آلمهیسیز. یخشی پولیس و یامان پولیس اۉیینی الّهقچان اېسکیرگن.»
او سۉزیده دوام اېتیب: «اگر اۉز مجبوريتلرینگیزنی بجریشگه اراده و امکانیتگه اېگه بۉلمهسنگیز، مذاکرهلر یۉلینی دوام اېتتیریش حقیده گپیریش نینگ معناسی یۉق»، دېب تأکیدلهدی.
بیر نېچه ساعت آلدین اسرایل اوردوسی لبناندهگی حزب الله تامانیدن اسرایل حدودیگه اویوشتیریلگن هجوملرگه جوابن بیروت نینگ ضاحیه تومنیدهگی حزب الله قرارگاهلریدن بیرینی نشانگه آلگنینی معلوم قیلگن اېدی.
مذکور هجوم امریکا و ایران اۉرتهسیده کېلیشوونی امضالش عرفهسیده صادر بۉلدی. اَیریم خبرلرگه کۉره، بوگون اوشبو حجت نینگ «الکترون امضالش» مراسمی اۉتکزیلیشی رېجهلشتیریلگن اېدی.
اسرایل جاري قویاشي ییل نینگ ۱۷-کونی هم بیروتدهگی ضاحیه حدودیگه ضربه بېرگن اېدی. بو واقعه ایراننینگ کېسکین رئاکسیونسیگه سبب بۉلیب، ایکّی دولت اۉرتهسیده قریب ۱۶ساعت دوام اېتگن حربي تۉقنهشوو یوزهگه کېلگن.
ایران نینگ تأکیدلشیچه، هر قندهی کېلیشوو لباندهگی اوروشنی تۉختهتیشنی هم اۉز ایچیگه آلیشی کېرهک. بیراق امریکا و اسرایل لبنان مسألهسی بۉییچه علیحده کېلیشوو طرفداری بۉلیب، او حزب اللهنی قورالسیزلنتیریشنی کفالتلشی لازم دېب حسابلهماقده.
