پاکستاننینگ بلوچستان ایالتیدهگی مدنی شفاخانهسیده بیر عیال داکتر تیزاب هجومیگه اوچرهدی. هجومچی، دستلبکی معلوماتلرگه کۉره، شفاخانه خادیمی بۉلگن و کېینچهلیک پولیس تامانیدن آتیب اۉلدیریلگن.
پاکستان«دان» نشرینینگ خبر بېریشیچه، واقعه شنبه کونی (۱۶-جوزا) توش پیتیده شفاخانه ایچیده صادر بۉلگن.
حادثه یوز بېرگن پیت عکس اېتگن ویدیو هم اجتماعي ترماقلرده ترقهلگن.
ویدیوده یاش بیر اېرکک داکتر بنادن چیقهیاتگن وقتده اونینگ یوزیگه تیزاب سالینگن ایدیشدهگی سویوقلیکنی سېپیب، واقعه جاییدن قاچیب کېتگنی کۉرینهدی.
جبرلنووچی داکترنینگ اسمی ماهنور ناصر بۉلیب، اَیریم معلوماتلرگه کۉره، او کوېتهدهگی مدنی شفاخانهسیده متخصص شفاکار صفتیده فعالیت یوریتهدی.
هجوم عاقبتیده داکتر ماهنور ناصرنینگ یوزی نینگ قریب 70 فایزی، شونینگدېک کۉکرهک قِسمی، قۉللری و آیاقلری نینگ اَیریم جایلری آغیر کویگن.
محلي پولیس وکیللریدن بیرینینگ معلوم قیلیشیچه، ماهنور ناصرگه دستلب ایش جاییده بیرینچی طبي یاردم کۉرسهتیلگن. کېینچهلیک او خصوصي شفاخانهگه اۉتکزیلگن، اما ضرور امکانیتلر یېترلی بۉلمهگنی سببلی تېزده هوا تېز یاردم خدمتی آرقهلی کراچیگه یوباریلگن.
هجومدن کېین قاچیب کېتگن گماندار پولیس تامانیدن کوزهتیب باریلگن و اتوبوس بېکتیده انیقلنگن.
کوېته نینگ باشقرهلاوچیسی عمران شوکت نینگ ایتیشیچه، هجومچی پولیس نینگ بیر نېچه مراتهبه تۉختش حقیدهگی آگاهلنتیریشلریگه بۉیسونمهگن و خوفسیزلیک خادملریگه قرهته اۉق اوزگن. شوندن سۉنگ او پولیس اۉقی بیلن واقعه جاییده اۉلدیریلگن.
اونینگ سۉزلریگه کۉره، «گماندار کوېتهدن اتوبوس آرقهلی قاچیشگه اورینگن پیتده پولیس بیلن یوز بېرگن تۉقنهشوو دوامیده هلاک بۉلگن».
بلوچستان باش وزیری سرفراز بوگتی همده ولایت ساغلیقنی سقلش وزیری بخت کاکر داکتر ناصرگه قیلینگن هجومنی کېسکین قارهلب، ایش یوزهسیدن جدّي تېرگاو آلیب باریلیشیگه وعده بېرگن.
حاضرچه هجومچی نینگ بو جنایتنی صادر اېتیشدهگی مقصدی انیق اېمس.
شونینگدېک، هجومچی شخصی نینگ کیملیگی بارهسیده هم فقط اَیریم خبرلر موجود بۉلیب، اولرده او شفاخانه خادیمی صفتیده تیلگه آلینماقده.
تصدیقلنمهگن معلوماتلرگه کۉره، گماندار ماهنور ناصر ایشلهیدیگن شفاخانهده لیفتلرگه تخنیکي خدمت کۉرسهتیش و اولرنی ترمیملش بۉلیمیده فعالیت یوریتگن. بیراق بو معلومات حاضرچه کوېته نینگ پولیس ادارهلری تامانیدن رسماً تصدیقلنمهگن.
