امریکا قۉشمه ایالتلرینینگ نمایندهلر مجلسی کم اوچرهیدیگن بیر قدم تشلب، مملکتنینگ ایرانگه قرشی اوروشدهگی حرکتلری بۉییچه جمهور رییس صلاحیتینی چېکلاوچی قطعنامهنی قبول قیلدی.
دموکراتلر تامانیدن پیشنهاد اېتیلگن اوشبو قطعنامه چهارشنبه کونی (۱۳ جوزا)۲۱۵ ته یاقلاوچی آوازگه قرشی۲۰۸ ته قرشی آواز بیلن تصدیقلندی.
امریکا نمایندهلر مجلسی جمهوریتچیلر نظارتیده بۉلیشیگه قرهمهی، تۉرت نفر جمهوریتچی وکیل دموکراتلر تامانیده آواز بېرگنی سببلی لایحه قبول قیلیندی.
قطعنامهده امریکا جمهور رییسی دونالد ترامپدن قوراللی کوچلرنی ایران بیلن حربي تۉقنهشوولردن آلیب چیقیش طلب اېتیلهدی.
ترامپ اوروش حرکتلرینی دوام اېتتیریشی اوچون کانگرس رسماً اوروش اعلان قیلیشی یاکه جمهور رییسگه ایرانگه قرشی حربي کوچ ایشلهتیش صلاحیتینی بېرووچی رخصتنامه چیقریشی کېرهک بۉلهدی.
بوندن اوّل هم دموکراتلر جمهور رییسنینگ ایرانگه قرشی قوراللی کوچلردن فایدهلنیش وکالتلرینی چېکلش مقصدیده اوچ مرته شونگه اۉخشش قطعنامهلرنی قبول قیلدیریشگه اورینگن اېدی. بیراق بو دورده نمایندهلر مجلسی و سناده جمهوریتچیلر کۉپچیلیکنی تشکیل قیلگنی اوچون اولر موفقیت قازانه آلمهگن.
ینگی قطعنامه ترامپنی ایران بیلن اوروشدن بوتونلهی چیقیشگه مجبور قیلمهیدی. او کۉپراق اونینگ اوروش سیاستیگه نسبتاً رمزي ناراضیلیک صفتیده بهالنماقده همده مملکت قانونلریگه کۉره، حربي عملیاتلرنی دوام اېتتیریش اوچون کانگرس رخصتینی آلیشی یاکه قۉشینلرنی «اۉزینی یاکه امریکانینگ همکار دولتلریدن بیرینی حمایه قیلیش» حالتیده سقلشی کېرهکلیگینی اېسلهتهدی.
