ایتاليا باش وزیری جورجیا ملونی افغانستاننینگ اوچ نفر و پاکستان نینگ بیر نفر فقراسی تیریکلهیین یاقیب یوباریلگنی یوزهسیدن مناسبت بیلدیریب، «تۉرت نفر قیشلاق خۉجهلیگی ایشچیسینینگ دهشتلی قاتللیگی» عیبدارلری عدالت آلدیده جواب بېریشینی وعده قیلدی.
ایتاليا باش وزیری چهارشنبه آقشامی ( ۱۳ جوزا) ایکس اجتماعي ترماغیده نشر قیلگن خبریده اوشبو حادثه قربانلری و اولرنینگ عایله اعضالریگه همدردلیک بیلدیردی.
ملونی شوندهی یازدی: «کالابریا ده تۉرت نفر قیشلاق خۉجهلیگی ایشچیسی نینگ دهشتلی قاتللیگی برچهمیزنی لرزهگه سالدی.»
اونینگ قۉشیمچه قیلیشیچه، «ایتاليا زۉروانلیک و وحشيلیک قرشیسیده چېکینمهیدی. بو دهشتلی جنایت نینگ برچه جهتلری تۉلیق آیدینلشتیریلیشی و برچه مسووللر عدالت آلدیده جواب بېریشی ضرور.»
باش وزیرنینگ ایتیشیچه، منطقهدهگی خوفسیزلیک کامرهلری یازوولری اۉرگنیلگچ، گمانلنووچیلر قۉلگه آلینگن و بو حقیقتنی انیقلش یۉلیدهگی مهم قدم حسابلنهدی.
طالبان تشقی ایشلر وزیرلیگی کېچه بیانات بېریب، ایتاليا حکومتیدن واقعه حقیقتینی انیقلش و قربانلر اوچون عدالتنی تأمینلش بارهسیده اۉز مسوولیتینی بجریشنی سۉرهگن اېدی.
افغانستان نینگ اوچ نفر و پاکستان نینگ بیر نفر فقراسی سهشنبه کونی ایتاليا نینگ جَنوبیدهگی کالابریا حدودیده موتر ایچیده تیریکلهیین یاقیب یوباریلیب اۉلدیریلگن. ایتاليا پولیسی اوشبو قاتللیکده گمان قیلینهیاتگن پاکستان نینگ ینه ایکّی نفر فقراسینی حبسگه آلگن.
ایتاليا عامهوي اخبارات واسطهلری قربانلر مهاجر ایشچیلر بۉلگنینی معلوم قیلگن.
قربانلر۲۸ یاشلی امین افضل خوگیانی،۲۷ یاشلی صفي ایجاد،۱۹ یاشلی عصمتالله قایمي همده۲۹ یاشلی پاکستان فقراسی وصیم خان بۉلیب، اولر قیشلاق خۉجهلیگی ساحهسیده ایشلهگن.
مذکور حادثهده عیبلنهیاتگنلر۳۲ یاشلی ایکّی نفر پاکستان فقراسی بۉلیب، خبرلرگه کۉره، اولر آدم قاچاقی و محنت استثمارسی بیلن شغللنگن.
