جهان ساغلیقنی سقلش تشکیلاتینینگ معلوم قیلیشیچه، کنگو دموکراتیک جمهوریتیده ابولا کسللیگی ترقهلیشی نینگ اۉن یېتّینچی تۉلقینیده کمیده۴۸ کیشی حیاتدن کۉز یومگن.
تشکیلات سهشنبه کونی (۱۲ جوزا) اعلان قیلگن معلوماتگه کۉره، سۉنگگی اوچ هفته دوامیده۳۲۱ته تصدیقلنگن کسللنیش حالتی و ۴۸ته اۉلیم قید اېتیلگن.
جهان ساغلیقنی سقلش تشکیلاتی مطبوعات کاتبی کریستین لیندمیر جینواده ژورنالیستلرگه بېرگن معلوماتیده، اوشبو دور مابینیده ابولا کسللیگیگه چهلینگن اتیگی آلتی نفر بېمار ساغهیگنینی ایتدی.
اونینگ سۉزلریگه کۉره، کنگوده ینه۱۱۶ ته گمان قیلینهیاتگن حالت هم قید اېتیلگن، بیراق بو کۉرستکیچ کسللیک نینگ ینگی تۉلقینی باشلنگن دستلبکی کونلرگه نسبتاً کمهیگنینی کۉرسهتهدی.
ابولاگه چهلینگن ایکّی نفر شفاکاردن بیری هم ساغهییب کېتگن.
ینگی تۉلقینده ابولا قربانلری قید اېتیلگن مملکتلردن ینه بیری اوگاندا دیر.
بیراق اوگاندا حکومتی و خلقارا ساغلیقنی سقلش تشکیلاتلری بو مملکتده فقط 15 ته تصدیقلنگن کسللنیش حالتینی رۉیخطگه آلگن.
متخصصلر نینگ تأکیدلشیچه، قرنتین قاعدهلریگه رعایه قیلیش و گمان قیلینهیاتگن بېمارلرنینگ ساغلیقنی سقلش مرکزلریگه اېرته مراجعت قیلیشی کسللیک نینگ ینه-ده کېنگ ترقهلیشی نینگ آلدینی آلیشگه یاردم بېرهدی.
جهان ساغلیقنی سقلش تشکلاتینینگ باشلیغی تدروس آدهانوم اوشبو هفته ابولا اېپیدېمیسیگه قرشی کورهش جریانینی کوزهتیش مقصدیده کنگوگه سفر قیلگن اېدی.
او یکشنبه کونی کنگونینگ بونیه شهریده ابولا کسللیگیدن ساغهیگن تۉرت نفر بېمار اوچون تشکیل اېتیلگن تدبیرده قتنهشدی همده ینگی ساغلیقنی سقلش مرکزی نینگ کلیتینی محلي حکومت وکیللریگه تاپشیردی.
