ایراننینگ فارس نیوز اخبارات آژانسینینگ خبردار منبعگه تهیهنیب خبر بېریشیچه، ایران و امریکا اۉرتهسیده دستلبکی کېلیشووگه اېریشیش مقصدیدهگی پیام المشینووی «کمیده بیر نېچه کوندن بویان تۉختهب قالگن».
اوشبو خبرگزارلیک بوگون (سهشنبه، ۱۲-جوزا) اعلان قیلگن خبرده، منبع ایران اسلام جمهوریتینینگ واشنگتنگه یوبارگن سۉنگّی پیامی لبنان مسألهسیگه عاید آچیق سیگنال بۉلگنینی و بو خلق ارا مقیاسده کېنگ عکس-صدا بېرگنینی بیلدیرگن.
بوندن آلدین تسنیم نیوز آژانسی هم اسرایلنینگ لبناندهگی هجوملری دوام اېتهیاتگنی و لبنان اۉت آچیشنی تۉختهتیش بۉییچه اساسي شرطلردن بیری بۉلگنی سببلی، ایران مذاکرهچیلر جماعهسی واسطهچیلر آرقهلی آلیب باریلهیاتگن ملاقاتلر همده متن المشووینی تۉختهتگنینی خبر قیلگن اېدی.
بیراق امریکا جمهور رییسی دونالد ترامپ تیناوون کېچقورون اسرایلنینگ لبنان پایتختی بیروتگه رېجهلشتیریلگن هجومی تۉختهتیلگنینی معلوم قیلگچ، «ایران اسلام جمهوریتی بیلن مذاکرهلر یوقاری سرعتده دوام اېتماقده»، دېب تأکیدلهدی.
ایران اېسه اسرایلنینگ لبناندهگی هجوملری کېنگهیگنیدن سۉنگ، ایران و امریکا اۉرتهسیدهگی اۉت آچیشنی تۉختهتیش کېلیشووی برچه جبههلرنی، جملهدن لبناننی هم قمرهب آلیشینی بیلدیردی.
تهراننینگ تأکیدلشیچه، «هر قندهی جبههده اۉت آچیشنی تۉختهتیش رژیمینینگ بوزیلیشی برچه جبههلرده اوشبو کېلیشوونینگ بوزیلیشی حسابلنهدی» و بونینگ عاقبتلری اوچون امریکا همده اسرایل جوابگر بۉلهدی.
