ایران تشقی ایشلر وزیری عباس عراقچی، اسرایلنینگ لبنانگه قرشی هجوملرینی دوام اېتتیریشی اۉت آچیشنی تۉختهتیش کېلیشووینینگ بوزیلیشی اېکنینی تأکیدلب، امریکا و اسرایل هر قندهی بوندهی قاعدهبوزرلیک عاقبتلری اوچون مسوول بۉلیشینی ایتدی.
او بوگون (دوشنبه، ۱۱ جوزا) ایکس اجتماعي ترماغیده نشر قیلگن خبریده ایران و امریکا اۉرتهسیدهگی صلح «شبههسیز برچه جبههلرده، جملهدن لبنانده هم عمل قیلهدیگن اۉت آچیشنی تۉختهتیش کېلیشووی» اېکنینی یازدی.
عراقچی، بیر جبههدهگی صلحنینگ بوزیلیشی برچه جبههلردهگی صلح نینگ بوزیلیشی حسابلنیشینی تأکیدلهدی.
شونینگدېک، اېران پارلمانی رئیسی و مذاکرهلر هیئتی اعضاسی محمد باقر قالیباف، اسرایلنینگ لبنانگه نسبتاً دېنگیز قملینی دوام اېتتیرهیاتگنی همده «حربي جنایتلرنی کوچهیتیرهیاتگنی» امریکانینگ صلحگه صادق اېمسلیگی نینگ یقّال دلیلی اېکنینی بیلدیردی.
او شوندهی آگاهلنتیردی: «هر بیر تنلاونینگ اۉز بهاسی بار و اونینگ حساب-کتابی بیر کون کېلیب تۉلهنهدی.»
ایران و امریکا اۉرتهسیدهگی مذاکرهلر کېلیشووگه اېریشیش یۉلیده معین سیلجیشلرگه اېریشگنی ایتیلهیاتگن بیر پیتده، اسرایل حزباللهگه قرشی حربي عملیاتلرینی کوچهیتیرگن.
ایران رسميلرینینگ لبناندهگی وضعیت یوزهسیدن آگاهلنتیریشلری امریکا جمهور رییسی دونالد ترامپ ایران بیلن بۉلهجک کېلیشوو لایحهسیگه اۉزگرتیریشلر کیریتیب، اونی ینه تهرانگه یوبارگن بیر وقتده ینگرهماقده.
