کویت اوردوسی «دشمن راکتلری و اوچووچیسیز اوچیش موشکلر»گه قرشی مدافعه آلیب بارهیاتگنینی معلوم قیلگنیدن سۉنگ، ایران و امریکا بیر-بیریگه قرشی ینگی هجوملر عملگه آشیریلگنینی بیلدیردی.
کویت قوراللی کوچلری باش قوماندانی بوگون (دوشنبه، ۱۱-جوزا) تانگده مملکت هوا مدافعهسی تیزیملری حاضرده «دشمنانه راکت و درون هجوملری»نی برطرف اېتهیاتگنینی معلوم قیلدی.
اوردو بیاناتیده ایتیلیشیچه، اگر پارتلش آوازلری اېشیتیلسه، بو هوا مدافعهسی تیزیملری تامانیدن اوچیریلگن نشانلرنینگ اوریب توشیریلیشی نتیجهسی دیر.
شو بیلن بیرگه، ایران سپاه پاسداران انیق منطقه نامینی تیلگه آلمهگن حالده، «هرمزگان ولایتیدهگی سِریک آرالیگه قیلینگن تجاوز منبعسی» نشانگه آلینگنینی معلوم قیلدی.
ایران اسلامي سپاه پاسداران جماعتچیلیک بیلن علاقهلر بۉلیمی بیاناتیده؛ «بوگون بیر نېچه ساعت اوّل امریکا نینگ تجاوزکار اوردوسی تامانیدن هرمزگان ولایتیدهگی سِریک آرالیده جایلشگن علاقه منارهسیگه هجوم قیلینگنیدن سۉنگ، سپاه نینگ اېراکاسمیک کوچلری هجوم منبعسی بۉلگن حربي-هوا بازهسینی نشانگه آلدی و بېلگیلنگن مقصدلر یۉق قیلیندی دېدی.»
امریکا ارتش مرکزی قوماندانلیگی (سنتکام) هم ایران حربی مواضعلرینی هجوم آستیگه آلگنیدن خبر بېردی.
سنتکام بوگون اېرتهلب ایکس اجتماعي ترماغیدهگی بیاناتیده شنبه و یکشنبه کونلری ایران نینگ سِریک جزیره همده قېشم جزیره حدودلریگه هجوم اویوشتیرگنینی معلوم قیلدی.
بیاناتگه کۉره، امریکا اوردوسی «اوشبو هفته آخریده سِریک و قېشم آراللریدهگی ایران ردر تیزیملری همده درانلرنی باشقریش و نظارت قیلیش مرکزلریگه قرشی اۉزینی حمایه قیلیش مقصدیدهگی ضربهلرنی عملگه آشیرگن».
سنتکام نینگ تأکیدلشیچه، سِریک و قېشمگه قیلینگن هجوملر امریکا نینگ امکیو ۱درانی اوریب توشیریلگنیگه جوابهن عملگه آشیریلگن.
سپاه پاسداران کېچه اقش نینگ امکیو-۱ روسومیدهگی درونی «ایران نینگ حدودي سوولریگه کیریب، دشمنلیک حرکتینی عملگه آشیریشگه اورینگنیدن سۉنگ زمانهوي هوا مدافعه راکتلری یاردمیده درحال اوریب توشیریلگنی»نی بیلدیرگن اېدی.
سنتکام اۉز درانلریدن بیری اوریب توشیریلگنینی تصدیقلهدی، بیراق اوشبو دران «خلقارا سوولر اوستیده پرواز قیلهیاتگنینی» دعوا قیلماقده.
