امریکا قۉشمه ایالتلری جمهور رئیسی اۉرین باسری جی دی ونس، امریکا قۉشمه ایالتلری و ایران اۉرتهسیدهگی مذاکرهلر کېلیشوو متنیدهگی «بیر نېچه نقطه» یوزهسیدن دوام اېتهیاتگنینی ایتدی.
سیانان خبریگه کۉره، جی دی ونس پنجشنبه کونی ژورنالیستلر بیلن صحبتده دونالد ترامپ تامانیدن ایران بیلن کېلیشوو لایحهسینی امضالش احتمالي وقتی حقیدهگی سوالگه جواب بېریب شوندهی دېدی: «جمهور رییس عیناً قچان یاکه عموماً اوشبو میموراندومنی امضالهیدیمی-یۉقمی، بونی ایتیش قیین. بیز [کېلیشوو لایحهسی] متنیدهگی بیر نېچه جهتلر بۉییچه محاکمه آلیب باریهپمیز.»
آکسیوس اخبارات آژانسی پنجشنبه کونی اېرتهراق امریکالیک و اېرانلیک مذاکرهچیلر ۶۰ کونلیک انگلشوو میموراندومی بۉییچه کېلیشووگه اېریشگنینی، اما ترامپ حلی یکوني تصدیغینی بېرمهگنینی خبر قیلگن اېدی.
آکسیوسنینگ یازیشیچه، امریکالیک مذاکرهچیلر یکوني کېلیشوو تفصیلاتلرینی ترامپگه یېتکزگن، اما او حجتنی درحال امضالهمهگن. بیر امریکالیک عملدار شوندهی دېگن: «جمهور رییس واسطهچیلرگه بو حقده اۉیلب کۉریش اوچون بیر نېچه کون وقت کېرهکلیگینی ایتدی.»
ایران رسميلری بو موضوعده حاضرچه ایضاح بېرمهگن. اما اسلام انقلابی محافظلری کارپوسیگه یقین بۉلگن تسنیم اخبارات آژانسی منبعگه تهیهنیب، اوشبو میموراندوم حلی یکونلنمهگنینی خبر قیلدی.
ترامپ نینگ اۉرینباسری مذاکرهلرده معلوم یوتوقلر بۉلگنینی تأکیدلب، ایراننینگ هستوي دستوری و باییتیلگن یورانیوم بۉییچه اَیریم مهم مسألهلر حلی هم اۉزگریش جریانیده اېکنینی ایتدی.
ونس شوندهی دېدی: «هستوي ماتریاللر، یوقاری درجهده باییتیلگن یورانیوم ذخیرهلری و باییتیش مسألهسی بۉییچه بیر نېچه موضوعلر بار. شونینگ اوچون بیز اولر (ایران) بیلن محاکمه آلیب باریهپمیز. بیز حاضرچه اولر مذاکرهلرده یخشی نیت بیلن اشتراک اېتهیاتگن دېب اۉیلهیمیز.»
او مذاکرهلرده ینه آلدینگه سیلجیش بۉلیشیگه امید بیلدیریب، بو آرقهلی کېلیشووگه اېریشیش ممکنلیگینی ایتدی.
شو بیلن بیرگه، ونس حلی بوندهی کېلیشوو البته عملگه آشیشیگه کفالت بېره آلمهسلیگینی هم تأکیدلهدی.
اونینگ سۉزلریگه کۉره: «بیز احتمال اۉتیریب، اوشبو مسألهلرنی حل قیلیشیمیز ممکن بۉلگن نقطهگه یېتهمیز، اما بو ینه بیرآز ایلگریلشنی طلب قیلهدی. مېن بو درجهگه یېتیشیمیزنی کفالتلهی آلمهیمن، اما حاضرچه بو بارهده یخشی حسیاتدهمن.»
ایران و امریکا اۉرتهسیده هجوملر المشینووی کوزهتیلگنیگه قرهمهی، ونس اۉت آچیشنی تۉختهتیش کېلیشووی حلی هم کوچده اېکنینی، اما امریکا اۉزینی حمایه قیلیش مقصدیده ضربه بېریش حقوقینی سهقلب قالیشینی ایتدی.
او شوندهی دېدی: «بوندهی اۉت آچیشنی تۉختهتیشلر هر دایم بیرآز ترتیبسیز بۉلهدی… بعضاً وضعیت ینه کېسکینلشهدی.»
ایران و امریکا پنجشنبه تانگیده فارس کۉرفزیده اۉزارا اۉق اوزیشگن و هر ایکّی تامان بیر-بیرینی اۉت آچیشنی تۉختهتیش کېلیشووینی بوزیشده عیبلهگن.
