امریکا جمهور رییسی دونالد ترامپ، عمان دولتینی حربي هجوم بیلن تهدید قیلدی.
ترامپ چهارشنبه کونی (۶جوزا) آق اویده ژورنالیستلرنینگ هرمز بۉغازی حقیدهگی سوالیگه جواب بېرر اېکن، بو مسألهگه تۉختهلدی.
او شوندهی دېدی: «هرمز بۉغازی همه اوچون آچیق بۉلهدی، چونکه بو خلقارا سوو یۉلی دیر. بیز نظارت قیلهمیز، اما اونی هېچ کیم باشقرمهیدی.»
ژورنالیستلرنینگ عمان ایران بیلن بیرگه کېمهلردن اۉتیش حققی آلیش اوچون همکارلیک قیلیشی احتمالی حقیدهگی سوالیگه جوابن، ترهمپ اگر عمان شوندهی قیلسه، «پارتلهتیب یوباریلیشی» بیلن تهدید قیلدی.
ترامپ، «عمان هم [فارس کۉرفزی دولتلری] کبی حرکت قیلهدی، عکس حالده بیز اولرنی پارتلهتیشگه مجبور بۉلهمیز. اولر بونی توشونهدی دېگن.»
عمان بیر نېچه اۉن ییللردن بویان امریکا بیلن اقتصادي و حربي علاقهلرگه اېگه. امریکا عمان حدودیده مستقل حربي بزهگه اېگه بۉلمهسه-ده، اونینگ بزهلریدن حربي مقصدلرده فایدهلنهدی.
اسوشتیدپرس خبرگزارلیگی سۉنگّی کونلرده ایران عماننی هرمز بۉغازینی بیرگهلیکده نظارت قیلیشگه کۉندیریشگه اورینهیاتگنی حقیده خبر بېرگن اېدی.
حاضرگچه عمان حکومتی بو مسألهده ایضاح بېرمهگن و ترامپ نینگ بیاناتلریگه هم مناسبت بیلدیرمهگن.
سیانان خبریگه کۉره، عمان دانهلد ترامپ جمهور رییسلیگینینگ۱۷ آیی دوامیده هجوم بیلن تهدید قیلینگن یاکه حربي عملیات اۉتکزیلگن۱۳-دولت حسابلنهدی.
