ایران رهبری مجتبی خامنهای، اۉزینینگ هییت تبریگیده منطقه خلقلری اېندی امریکا حربی مرکزلرینینگ «قلقانی» بۉلمسلیگینی ایتگن.
خامنهاینینگ هییت بیاناتی بوگون (سهشنبه،۵ جوزا) ایران دولت عامهوي اخبارات واسطهلری آرقهلی نشر قیلینگن بۉلیب، اونده امریکا بیلن اوروشگه هم اشاره قیلینگن.
بیاناتده: «زمان ساعتی آرتگه قَیتمهیدی و منطقه خلقلری همده حدودلری اېندی امریکا قۉشمه ایالتلری حربي بزهلری نینگ قلقانی بۉلمهیدی دېگن.»
او امریکا اېندی منطقهده «یاووزلیک و حربي بزهلر جایلشتیریش اوچون خوفسیز نقطه بۉله آلمهیدی» دېب آگاهلنتیرگن.
ایران-امریکا اوروشی دوامیده منطقه دولتلری، جملهدن بیرلشگن عرب امیرلیکلری، قطر، سعوديه عربستانی، کویت و بحرین امریکا حربي بزهلریگه مېزبانلیک قیلگنی سببلی ایران درون و راکت هجوملریگه اوچرهگن.
بیراق بو دولتلرنینگ هېچ بیری رسماً و آچیق طرزده ایران بیلن اوروشگه کیریشمهگن.
ایران رهبری مسلمان دولتلرینی بیر-بیریگه دۉستلیک و یاردمگه چقیرگن.
او شوندهی دېگن: «صدق و اخلاص بیلن برچه اسلام دولتلری و حکومتلرینی دۉستلیک و همکارلیککه چقیرهمن، تاکه اولر بیرگهلیکده اسلام امتی ترقیاتی و معمالرینی حل قیلیش یۉلیده قدم تشلهسینلر.»
مجتبی خامنهای آتهسی علی خامنهای 1404 قویاش ییل 9 حوتده امریکا و اسرایل نینگ قۉشمه هجومیده هلاک بۉلگنیدن کېین رهبر اېتیب سهیلنگن.
او حاضرگچه عامه آلدیده کۉرینمهگن و اونینگ صورتی هم نشر قیلینمهگن.
شو سببلی اونینگ تیریکلیگی بارهسیده شبههلر پیدا بۉلگن.
بیراق اَیریم امریکا یېتکرمهلری و استخبارات منبعلریگه تهیهنیب، مجتبی خامنهای تیریکلیگینی و هجوم پیتیده جراحت آلگن بۉلسه هم، مملکت مهم قرارلریده «تأثیرلی رۉل» اۉینهیاتگنینی خبر قیلگن.
