ایران سپاه پاسداران حربیلری سۉنگّی بیر کېچه و کوندوز ایچیده اوشبو کوچلر بیلن موافقلشتیریلگن حالده۲۶ ته کېمه هرمز بۉغازی آرقهلی حرکتلنگنینی معلوم قیلدی.
تسنیم خبرگزارلیگی گزارشیگه کۉره، بوگون (چهارشنبه، ۳۰-ثور) ایران سپاه پاسداران حربیلری بو کېمهلر نفت تانکیرلری، کانتنیر تشووچی و باشقه تجاري کېمهلردن عبارت اېکنینی بیلدیرگن. اولر سپاهنینگ دېنگیز کوچلری بیلن موافقلشتیریلگن حالده هرمز بۉغازیدن اۉتگن.
ایران سپاه پاسدارن حربیلری «هرمز بۉغازیدن اۉتیش رخصتنامه آلیش و سپاه دېنگیز کوچلری بیلن موافقلشگن حالده عملگه آشیریلماقده»، دېگن.
آلدینراق رویترز خبرگزارلیگی کمیده آلتی میلیون بشکه نفت آرتیلگن اوچته تانکیر هرمز بۉغازیدن اۉتگنینی خبر قیلگن اېدی.
مذکور خبرگزارلیک معلوماتیگه کۉره، کویتنینگ ایکّی میلیون بشکه نفتینی آلیب کېتهیاتگن جَنوبي کوریا بیراغی آستیدهگی تانکیر بوگون هرمز بۉغازیدن اۉتهیاتگنی کوزهتیلگن.
رویترز ینه ایکّی اولکن چین تانکیری هم بوگون هرمز بۉغازیدن اۉتگنینی بیلدیرگن. اولر تۉرت میلیون بشکه نفتنی عراق بصره نفتی و قطر نینگ الشاهین نفتینی تشياتگن بۉلگن.
ایران امریکا و اسرایلنینگ اوشبو مملکتگه قرشی هجوملری باشلنگنیدن کېین هرمز بۉغازینی یاپگنینی بیلدیرگن همده تجاري کېمهلر فقط ایران دېنگیز کوچلری بیلن موافقلشلگن و اولر بېلگیلهگن یۉنهلیش آرقهلی اۉتیشی ممکنلیگینی ایتگن.
دنیا نفت و گازی نینگ قریب۲۰ فایزی اۉتهدیگن هرمز بۉغازینینگ یاپیلیشی آرتیدن کۉپلب مملکتلرده نفت نرخلری کېسکین آشگن اېدی.
