خلق ارا عامهوي اخبارات واسطهلرینینگ خبر بېریشیچه، روسيهنینگ اوکراینگه تونگی هجوملریده کمیده بیر کیشی جان بېرگن و ینه۳۰کیشی یرهلنگن.
رویترز خبرگزارلیگیگه کۉره، اوکراین رسميلری روسيه کېچهسی جَنوبدهگی اودسا و جَنوبی-شرقدهگی دنیپر شهرلرینی درون و راکت هجوملری بیلن نشانگه آلگنینی معلوم قیلگن.
بو هجوملر اوکراین تامانیدن روسيهگه قیلینگن درون ضربهلریدن بیر کون اۉتیب صادر بۉلگن بۉلیب، اۉشه هجوملرده کمیده 4 کیشی، جملهدن مسکوده۳ کیشی هلاک بۉلگن اېدی.
رویترز گزارشیگه کۉره، اوکراین خرسون ولایتی گوبېرناتوری الکساندر پروکودین اوشبو حدودگه قیلینگن هجوملرده بیر کیشی هلاک بۉلگنی و۹ کیشی جراحت آلگنینی بیلدیرگن.
شو بیلن بیرگه، اودسا ولایت حربي مأموریتی رهبری سرهی لیساک روسيه درونلری تورر-جای بنالری، مکتب و بالهلر باغچهسیگه کېلیب توشگنینی ایتگن. بو هجوملرده۱۱ یاشلی باله و۵۹ یاشلی اېرکک جراحت آلگن.
محلي رسميلرگه کۉره، روسيه علیحده هجومده دنیپر شهرینی راکتلر بیلن نشانگه آلیب، 18 کیشینی، جملهدن۲ یاشلی قیزچه و۱۰ یاشلی بالهنی جراحتلهگن.
زاپوریژژیا ولایتی ایوان فدوروف هم روسيهنینگ تونگی هجوملریده۳کیشی جراحت آلگنینی معلوم قیلگن.
شو بیلن بیر وقتده روسيهنینگ اینترفاکس خبرگزارلیگی روسيه اۉز حدودیگه اوچیریلگن بیر نېچته اوکراین درونلرینی اوریب توشیرگنینی خبر قیلگن.
روسيه-اوکراین اوروشی ۲۰۲۲-ییل فبرورییدن بېری دوام اېتماقده و حاضرده ایکّی تامان اساسن درون و راکت هجوملری بیلن اۉزارا ضربهلر بېرماقده.
دنیانینگ تورلی دولتلری اوروشنی تۉختهتیشگه حرکت قیلگن بۉلسه-ده، حلی هم تامانلر تینچلیک کېلیشوویگه اېریشه آلمهگن.
