بیرلشگن عرب امیرلیکلریدهگی ابوظبی مطبوعات ادارهسی «براکه» اتوم الکتر ستشنی اوشبو شهرنینگ « الظفره» حدودیده درون هجومیگه اوچرهگنینی معلوم قیلدی.
بیاناتگه کۉره، هجوم بوگون (یکشنبه، ۲۷-ثور) عملگه آشیریلگن و نتیجهده ستشن حدودیدن تشقریده جایلشگن بیر جنراتور یانیب کېتگن.
ابوظبی رسميلری حاضرگچه اوشبو هجوم عاقبتیده هېچ قندهی قۉشیمچه حادثه قید اېتیلمهگنینی و رادیولوگیک خوفسیزلیک درجهسیگه هېچ قندهی تأثیر بۉلمهگنینی بیلدیرگن.
بیرلشگن عرب امیرلیگینینگ هسته نظارت ادارهسی هم هجومنی تصدیقلب، یانغین الکتر ستشنی خوفسیزلیگی یاکه اونینگ مهم تیزیملری فعالیتیگه تأثیر قیلمهگنینی، برچه بلاکلر عادتدهگی ترتیبده ایشلهیاتگنینی معلوم قیلگن.
ابوظبی رسميلری حاضرچه درون هجومینی قَیسی دولت عملگه آشیرگنینی آچیقلهمهگن.
امریکا و اسرایلنینگ ایرانگه قرشی اوروشی باشلنگنیدن سۉنگ، بیرلشگن عرب امیرلیکلری ایران تامانیدن اویوشتیریلگن کېنگ کۉلملی راکت و درون هجوملری نشانیگه ایلنگن.
اۉتگن هفته هم بیرلشگن عرب امیرلیگی ایراننی مملکتگه قرشی بیر نېچه درون و راکت هجوملرینی عملگه آشیرگنلیکده عیبلهگن اېدی. بیرلشگن عرب امیرلیگی رسميلری اوشبو هجوملرده اوچ نفر هندستان فقراسی یرهلنگنینی و فجیره صناعت حدودیدهگی بیر نفتنی قَیته ایشلش فابریکهده یانغین یوز بېرگنینی تصدیقلهگن.
