ایران عاموی اخبارات واسطهلرینینگ خبر بېریشیچه، پاکستان ایچکی ایشلر وزیری محسن نقوی ایکّی کونلیک رسمي سفر بیلن بوگون (شنبه، ۲۶ثور) تهرانگه یېتیب بارگن.
تسنیم خبرگزارلیگی معلوماتیگه کۉره، اوشبو سفر «پاکستاننینگ مذاکرهلرنی یېنگیللشتیریش و منطقوي تینچلیکنی ترغیب قیلیش بۉییچه دواملی سعی-حرکتلری دایرهسیده» عملگه آشیریلماقده.
نشرنینگ یازیشیچه، پاکستان ایچکی ایشلر وزیرینی تهرانگه کېلگنیده ایران ایچکی ایشلر وزیری اسکندر مومني کوتیب آلگن. شوندن سۉنگ تامانلر اوچرهشوو اۉتکزیب، «ایران-پاکستان مناسبتلری و تینچلیک مذاکرهلرینی قَیته باشلش استقباللری» حقیده صحبتلشگن.
ایران دولت یېتکرمهسی صدا و سیما خبرگزارلیگینینگ هم خبر بېریشیچه، ایران ایچکی ایشلر وزیری پاکستانلیک همکسبی بیلن اوچرهشووده تهران پاکستان تشبثلرینی «کتّه حرمت و احترام بیلن» قبول قیلیشینی ایتگن. او، شونینگدېک، پاکستان اوردوسی قوماندانی عاصم منیرنینگ «دوام اېتهیاتگن ماجرانی حل قیلیش یۉلیدهگی سعی-حرکتلرینی» صمیمي و مسوولیتلی دېب بهالهگن.
ایران و امریکا 40 کونلیک اوروشدن سۉنگ پاکستان واسطهچیلیگیده اۉت آچیشنی تۉختهتیشگه اېریشگن و ایلک تۉغریدن-تۉغری اوچرهشوولرینی اسلام آبادده اۉتکزگن اېدی.
بیراق اسلام آباددهگی مذاکرهلر انیق نتیجه و کېلیشووسیز یکونلنگن. پاکستاننینگ ایران و امریکا اۉرتهسیدهگی نوبتدهگی مذاکرهلرگه مېزبانلیک قیلیشگه قرهتیلگن اورینیشلری هم حاضرچه نتیجه بېرمهگن.
