امریکا جمهور رییسی دونالد ترامپ، امریکا و نایجریا کوچلری قۉشمه عملیات دوامیده دنیادهگی داعشنینگ ایکّینچی رقملی قوماندانی حسابلنگن «ابو بلال المینوکی» نی یۉق قیلگنینی معلوم قیلدی.
امریکا جمهور رییسی بوگون (شنبه،۲۶ ثور) محلي وقت بیلن تانگده بېرگن بیاناتیده ایکّی دولت کوچلری اوشبو مرکّب عملیاتنی انیق و بېنقصان عملگه آشیرگنینی ایتدی.
ترامپ نینگ سۉزلریگه کۉره، «ابو بلال المینوکی» افریقاده یشیرینیب قالهمن دېب اۉیلهگن، بیراق امریکا اونینگ فعالیتی حقیده معلومات یېتکزیب تورووچی منبعلرگه اېگه اېکنینی بیلمهگن.
امریکا قۉشمه ایالتلری جمهور رییسینینگ قۉشیمچه قیلیشیچه، «او اېندی افریقا خلقلرینی ترور قیلمهیدی و امریکالیکلرنی نشانگه آلیش بۉییچه عملیاتلرنی رېجهلشتیریشگه یاردم بېره آلمهیدی. اونینگ یۉق قیلینیشی بیلن داعش نینگ گلوبل عملیاتلری سېزیلرلی درجهده ضعیفلشدی. اوشبو اۉپراسیوندهگی همکارلیک اوچون نایجریا حکومتیگه منّتدارچیلیک بیلدیرهمن.»
نایجریا حکومتی هم اوشبو مملکتده داعشنینگ یوقاری مرتبهلی یېتکچیلریدن بیری اۉلدیریلگنینی تصدیقلهدی.
نایجریا جمهو رییسی بولا تینوبو بیاناتیده شوندهی دېگن: «نایجریا قوراللی کوچلری قطعي اراده بیلن و امریکا قوراللی کوچلری بیلن یقین همکارلیکده آلیب باریلگن جسارتلی قۉشمه عملیاتده داعشگه آغیر ضربه بېردی.»
نایجریا اوردوسی هم «ابو بلال المینوکی» داعشنینگ یوقاری درجهدهگی یېتکچیلریدن بیری و دنیادهگی اېنگ فعال ترورچیلردن بیری» دېب اتهب، اونینگ یۉق قیلینگنینی معلوم قیلگن.
