چین جمهور رییسی شی جینپینگ امریکا جمهور رییسی دونالد ترامپنینگ پکنگه سفری یکوني کونیده، اولرنینگ مذاکرهلری ایکّی دولت اۉرتهسیدهگی «استراتیژیک و برقرار مناسبتلر اوچون ینگی باسقیچ» یرهتگنینی ایتدی.
شینهوا خبر گزارلیگیگه کۉره، ترامپ و شی اۉرتهسیدهگی یکوني مذاکرهلر بوگون (جمعه، ۲۵ ثور) چین کمونیستیک حزبی رهبریتی قرارگاهی ژونگنانهای ده بۉلیب اۉتگن.
مذکور یېتکرمه خبریگه کۉره، شی جینپینگ اوشبو اوچرهشوونی «تاریخي و مهم» دېب تعریفلب، ایکّی یېتکچی «اۉز دولتلری اۉرتهسیدهگی کانتروکتیف، استراتژیک و برقرار علاقهلر اوچون ینگی اۉرین یرهتگنینی» ایتگن.
شی شوندهی دېگن: «جمهور رییس ترامپ امریکانی ینه بویوک قیلیشنی ایستهیدی، مېن اېسه چین خلقینی چین ملتینینگ بویوک تیکلنیشینی عملگه آشیریش سری یېتهکلشگه صادقمن.»
او «مهم کېلیشوو»گه اېریشیلگنینی ایتیب، هر ایکّی تامان اوشبو کېلیشوولرنی عملگه آشیریشی کېرهکلیگینی قۉشیمچه قیلگن.
دونالد ترامپ هم بو سفرنی «جوده موفقیتلی، دنیا مقیاسیده اعتراف اېتیلگن و اونوتیلمس» دېب بهالهگن.
مخصوص طنطنهلی کوتیب آلیش مراسملریگه گواه بۉلگن ترهمپ، شی جینپینگ «اېسکی دۉستی» دېب اتب: «مېن اونی جوده حرمت قیلهمن»، دېگن.
شونینگدېک، ترهمپ شی جینپینگ یقین کېلهجکده، احتمال سپتمبر آییده، واشنگتن دیسیگه تشریف بویوریشگه پیشنهاد قیلگن.
ترامپنینگ پکنگه سفری اونگه کابینه اعضالری و امریکالیک میلیاردرلر نینگ کتّه هیئتی همراهلیک قیلگن سفر بوگون یکونیگه یېتماقده.
تامانلر اۉرتهسیده اېریشیلگن کېلیشوولر حقیده حاضرچه تۉلیق گزارش نشر قیلینمهگن.
امریکا و چین یېتکرمهلری ترقتگن معلوماتلرگه قرهگنده، ایران اوروشی و تایوان مسألهسی ایکّی دولت نینگ سودا-اقتصادي مذاکرهلریگه هم تأثیر کۉرسهتگن. ترامپ کۉپراق اقتصادي یوتوقلری و امریکانینگ یقین شرقدهگی حربي عملیاتلریگه اورغو بېرگن بۉلسه، چین جمهور رییسی تایوان مسألهسینی حل اېتیشگه علیحده اعتبار قرهتگن.
