امریکا قۉشمه ایالتلری جمهور رییسی دونالد ترامپ چین تامانیدن۲۰۰ ته بوېینگ اوچاغی بویورتمه قیلینگنی حقیده معلوم قیلگنیدن سۉنگ، اوشبو امریکا اوچاق توزهتیش کمپنیسی سهامی قیمتی۴ فایزدن کۉپراققه توشیب کېتدی.
امریکا جمهور رییسی پنجشنبه آقشامیده فاکسنیوز بیلن صحبتده چین۲۰۰ ته بوېینگ خرید قیلیشگه راضی بۉلگنینی ایتدی.
اونینگ قۉشیمچه قیلیشیچه، بو رقم «تحلیلچیلر کوتگنیدن انچه کم».
رویترز خبریگه کۉره، بو ینگیلیک اعلان قیلینگچ، بوېینگ کمپنیسی سهامی قیمتی۴.۱فایزگه پهسهیگن.
مذکور اخبارات آژانسیگه کۉره، متخصصلر و سرمایه یاتقیزوچیلر چین کمیده۵۰۰ ته بوېینگ۷۳۷ مکس اوچاقیگه بویورتمه بېرهدی دېب کوتگن اېدی. بیراق چین هوا پیما شرکتلرینینگ بویورتمهلری حکومت راضیلیگی و نظارتی آستیده عملگه آشیریلهدی همده بویورتمهلر سانی ایکّی دولت اۉرتهسیدهگی سیاسي مناسبتلرگه باغلیق.
بوېینگ اروپانینگ ایربوس کمپنیسی بیلن رقابتده دنیادهگی ایکّینچی ییریک هوانورد بازاریدهگی موقعینی سقلب قالیشگه اورینماقده.
اما چین نینگ حاضرگی بویورتمهسی ۲۰۱۷-ییلده ترامپ نینگ پکنگه سفری چاغیده بېریلگن اوّلگی ییریک بویورتمهدن هم کمراقدیر. اۉشه پیتده چین۳۰۰ ته بوېینگ اوچاقیگه بویورتمه بېرگن اېدی.
متخصصلرنینگ ایتیشیچه، سیاحتگه بۉلگن طلب نینگ کېسکین اۉسیشیگه ماسلشیش اوچون پکن حاضردناق مینگتهگچه، ۲۰۴۵ییلگچه اېسه قریب ۹مینگ ینگی اوچاقگه احتیاج سېزهدی.
شو سببلی دنیانینگ ایکّی ییریک اوچاق ایشلب چیقرووچیسی بوېینگ و ایربوس چین دن اېنگ کۉپ بویورتمه آلیش اوچون کېسکین رقابت قیلماقده.
بوېینگ باش مدیری کلی اورتبرگ، ترامپ نینگ حاضرگی سفریده اونگه همراهلیک قیلماقده. او رویترزگه بېرگن صحبتیده چین بیلن «کتّه کېلیشوو» امضالش اوچون ترامپ حکومتی قۉللب-قوّتلشیگه امید قیلهیاتگنینی ایتگن اېدی.
اما پکن نیمه سببدن بازار کوتگنی نینگ یرمیدن هم کم بویورتمه بېریشگه قرار قیلگنی حاضرچه نامعلوم.
