امریکا تشقی ایشلر وزیری مارکو روبیونینگ ایتیشیچه، اگر ایران هستهی قورالیگه اېگه بۉلسه، اوهرمزنی دایمي روشده نظارت قیلهدی.
امریکا تشقی ایشلر وزیری «انبیسی» بیلن صحبتده یاقیلغی نرخلری حقیده گپیرر اېکن، «هستهلی اېران» بوندن هم آغیرراق عاقبتلرگه آلیب کېلیشینی ایتگن.
روبیو شوندهی دېگن: «هرمز بۉغازی آچیلهدی و بیز نفت نرخی نینگ پهسهییشینی کۉرهمیز. اما مېن ینه شونی ایتهمن: هستهلی اېراننینگ اۉز بهاسی بار»
اونینگ آگاهلنتیریب ایتیشیچه «اگر بیر کون کېلیب ایران هسته قورالیگه اېگه بۉلسه، اولرنی هرمز بۉغازینی نظارت قیلیشدن نیمه تۉختهته آلهدی؟ بو دایمي معما بۉلهدی»، دېگن.
امریکا و اسرایل نینگ ایرانگه قیلگن هجوملری همده هرمز بۉغازی نینگ یاپیلیشیدن سۉنگ دنیا بۉیلب انرژی نرخلری آشگن. شو بیلن بیرگه، تورلی محصولات و خدمتلر نرخی هم کۉتریلیب، گلوبل سودا جریانی ایزدن چیققن.
دونالد ترامپ اۉتگن هفته، ایران نینگ هسته قورالیگه اېگه بۉلیشی نینگ آلدینی آلیش اوچون حرکت قیلهیاتگن پیتده امریکالیک فقرالر نینگ اقتصادي احوالیدن خواطرده اېمسلیگینی ایتگن اېدی.
اونینگ سۉزلریگه کۉره، ایراننینگ هسته دولتیگه ایلنیشی نینگ آلدینی آلیش، حکومت خرجتلری و امریکا فقرالریگه توشهدیگن اقتصادي باسیمنی آقلهیدی.
ایران حکومتی اېسه حاضرگچه رسمي بیاناتلریده هسته قورالینی قۉلگه کیریتیشگه اورینهیاتگنینی دایما رد اېتیب کېلگن.
اما ایران پارلمانی ملي خوفسیزلیک کمیسیونی مطبوعات سۉزلاوچیسی ابراهیم رضایی (سهشنبه۲۲ ثور) پارلمان امریکا ینه ایرانگه هجوم قیلسه، یورانیومنی باییتیش درجهسینی۹۰ فایزگه یعنی قورال درجهسیگچه آشیریش حقیدهگی لایحهنی کۉریب چیقهیاتگنینی معلوم قیلگن.
