اروپا اتفاقیگه اعضا بۉلگن۲۷ دولت تشقی ایشلر وزیرلری حماس رهبرلری همده غربي ساحلدهگی اسرایللیک کۉچمنچیلرگه قرشی چېکلاولر جاري اېتیش رېجهسینی بیر آوازدن معقولهدی.
اروپا اتفاقی دیپلوماتلری دوشنبه کونی (۲۱-ثور) بروکسل شهریده ییغیلیب، اوشبو رېجه بۉییچه آواز بېردیلر.
اورپا بیرلشمهسینینگ تشقی سیاستلر مسوولی کایا کالاس ایکس اجتماعي ترماغیده یازیشیچه، چېکلاولر «کۉچمنچیلرنینگ فلسطینلیکلرگه قرشی زۉرآورلیگی» سببلی جاري اېتیلماقده.
اونینگ قۉشیمچه قیلیشیچه، «زۉرآورلیک عاقبتسیز قالمهیدی. اېندی باشی بېرک کۉچهدن چیقیب، عملي چارهلر کۉریش وقتی کېلدی.»
فرانسه تشقی ایشلر وزیری ژان نوئل بارو اېسه ایکس اجتماعی ترماغیده یازیشیچه، «غربي ساحلده افراطیت و زۉرآور کۉچمنچنی قۉللب-قوّتلهیاتگن اساسي اسرایللیک تشکیلاتلر چېکلاوگه اوچرهیدی.»
بونگه جوابا اسرایل تشقی ایشلر وزیری گيدعون ساعر، اوشبو قرارنی «سیاسي و اۉزباشیمچهلیک بیلن قبول قیلینگن» دېب اتهدی همده ایسرایل «یهوديلرنینگ اۉز تاریخي وطنی مرکزیده یشش حقوقینی» حمایه قیلیشده دوام اېتیشینی ایتدی.
اروپالیک دیپلوماتلر اېسه «اسرایل حکومتیگه باسیم اۉتکزیش» مسألهسیدن تيیلیشگن.
حاضرچه چېکلاولر عیناً قَیسی شخصلرنی نشانگه آلیشی انیق اېمس.
آسوشیتدپرس خبرگزارلیگیگه کۉره، چېکلاولر رۉیخطی و اونینگ نشانلرینی انیقلش اوچون مخصوص کمیته توزیلهدی.
اما اسرایل هاآرتص کوندهلیگینینگ یازیشیچه، رۉیخطگه آمانا، نچالا، هاشومر یوش، رگاویم تشکیلاتلری همده اولرنینگ اَیریم رهبرلری دانیلا وایس، مئیر دویچ و آویخای سویسا کیریتیلیشی ممکن.
چېکلاولرنینگ بیر قِسمی اسرایللیک کۉچمنچیلر و اولرنینگ تشکیلاتلریگه نسبتاً «بایلیکلرنی موزلهتیش و سفر چېکلاولری»نی اۉز ایچیگه آلیشی ممکن.
کۉپینچه «اسرایللیک کۉچمنچیلر حرکتینینگ چۉقینتیرگن آنهسی» دېب اتلهدیگن نچالا یېتکچیلریدن بیری وایس آسوشیتدپرسگه بېرگن صحبتیده چېکلاولر بۉییچه حلی هېچ قندهی رسمي بیلدیریشنامه آلمهگنینی و اروپا اتفاقی نینگ بو قرارینی توشونمهیاتگنینی ایتدی.
او چېکلاولرنی «کولگیلی»، وضعیتنی اېسه «جوده ارزیمس» دېب اتهب، بو چارهلر حرکت فعالیتیگه تۉسقینلیک قیلمسلیگینی تأکیدلهدی.
