روسیه جمهور رییسی ولادیمیر پوتین روسيه و اوکراین اۉرتهسیدهگی اوچ کونلیک صلح جریانیده اوکراین اوروشی «یکونیگه یقینلشهیاتگنینی» ایتدی.
پوتین شنبه کونی (۱۹-ثور) «غلبه کونی» طنطنهلریدن سۉنگ اۉتکزیلگن مطبوعات انجمنیده: «مېنیمچه، بو ماجرا یکونیگه یقینلشماقده، بیراق حلی هم جدّي مسأله بۉلیب قالماقده»، دېدی.
فرانسه خبرگزارلیگی گزارشیگه کۉره، پوتین اوشبو انجمنده اوکراین کوچلرینی «تجاوزکار کوچ» دېب اتهب، اولرنی ناتو منفعتلری یۉلیده اوروشهیاتگنلیکده عیبلهگن.
اونینگ سۉزلریگه کۉره: «غرب و ناتو کيیفنی قۉللب-قوّتلش آرقهلی روسيهگه قرشی قرهمه-قرشیلیکنی باشلهدی. اولر مسکو بیر نېچه آی ایچیده آغیر مغلوبیتگه اوچرهیدی و روسيه پرچهلنهدی دېب اۉیلشگن اېدی. اما بو صادر بۉلمهدی. اېندی اولر اۉزلری چیقیب کېته آلمهیدیگن چوقورگه توشیب قالیشدی.»
پوتین ینه فقط احتمالي کېلیشوو تیار بۉلگن تقدیردهگینه ولادیمیر زلنسکیی بیلن اوچینچی بیر دولت توپراغیده اوچرهشیشینی ایتدی. اونینگ تأکیدلشیچه، بوندهی اوچرهشوو مذاکره نینگ اۉزی اېمس، بلکه یکوني نقطهسی بۉلیشی کېرهک.
روسيه و اوکراین امریکا قۉشمه ایالتلری واسطهچیلیگیده اوچ کونلیک صلحگه کېلیشگن. صلح روسيهده هر ییلی سابق ساوېت اتفاقی نینگ ایکّینچی جهان اوروشیده آلمان نازی اوستیدن قازانگن غلبهسی نشانلنهدیگن «غلبه کونی» بیرهمی بیلن بیر وقتده باشلنگن.
هر ایکّی تامان کېچهدن بویان بیر-بیرینی صلحنی بوزیش و تینچ اهالینی نشانگه آلیشده عیبلهیاتگن بۉلسه-ده، حاضرچه ییریک تۉقنهشوو قید اېتیلمهگن.
دونالد ترامپ صلح واسطهچیسی صفتیده اۉزینینگ تروثسوشیال ترماغیده: «امید قیلهمنکی، بو جوده اوزاق، قانلی و آغیر اوروش نینگ یکونیگه باشلنیش بۉلهدی»، دېب یازگن.
او، شونینگدېک، صلح محبوسلر المشینووی بیلن بیرگه عملگه آشیریلیشینی بیلدیرگن.
رېجهگه کۉره، اوچ کونلیک صلح دوامیده تامانلر مینگ نفردن محبوس المشیشی کېرهک اېدی.
بیراق پوتین بو بارهده کيېف حلی رسمي پیشنهاد آلینمهگنینی ایتگن.
