پاریس هرمز بۉغازیده اېرکین کېمهچیلیکنی حمایه قیلیش اوچون کۉپ ملتلی ماموریتنی کۉریب چیقهیاتگن بیر پیتده، فرانسه نینگ هواپیمابر بیر ناوی سویس کانالی آرقهلی قیزیل دېنگیزگه کیریب عدن خلیجیگه یېتب بارگن.
رویترز خبریگه کۉره، «شارل د گل» طیاره تشووچی کېمهسی اۉزینینگ حربي گروهی بیلن چهارشنبه کونی (۱۶-ثور) قیزیل دېنگیزگه کیریب، عدن قۉلتیغیگه یېتیب کېلگن.
نشر فرانسه رسميلریگه تهیهنیب یازیشیچه، اوشبو حربي کېمهنینگ منطقهگه یوباریلیشیدن مقصد «هرمز بۉغازیده اېرکین کېمهچیلیکنی حمایه قیلیش بۉییچه مدافعه ماموریتیگه تیارگرلیک کۉریش»دیر.
فرانسه و بویوک بریتانيا بیر نېچه هفتهدن بویان کېمهلر حرکتی خوفسیزلیگینی تأمینلش اوچون خلقارا ائتلاف توزیشگه اورینماقده. حاضرگچه۱۲ دولت اوشبو ائتلافگه قۉشیلیشگه قیزیقیش بیلدیرگن و قریب 40 دولت مذاکرهلرده قتنشماقده.
فرانسه طیاره تشووچی کېمهسینینگ یقین شرققه کیریب کېلیشی بیلن بیر وقتده، امانوئل مکرون مسعود پزشکیان بیلن تیلفون آرقهلی ملاقات قیلگن.
امانوئل مکرون ایکس اجتماعی پلاتفورمسیدهگی پُستیده ایران جمهور رییسی بیلن صحبتده شوندهی تأکیدلهگنینی یازدی: «برچه تامانلر هېچ قندهی کېچیکیشسیز و شرطسیز هرمز بۉغازیدهگی قملنی بېکار قیلیشی کېرهک.»
او ینه شوندهی دېگن: «بیز [ایران و امریکا] ماجراسیدن اوّل موجود بۉلگن تۉلیق اېرکین کېمهچیلیک تیزیمیگه برقرار طرزده قَیتیشیمیز کېرهک.»
بونگه جوابن مسعود پزشکیان هرمز بۉغازینینگ تۉلیق آچیلیشینی «امریکا تامانیدن جاري اېتیلگن دېنگیز قملی نینگ بېکار قیلینیشی» بیلن باغلگن.
