امریکا قۉشمه ایالتلرینینگ جمهور باشلیغی دونالد ترامپ، اگر ایران کېلیشووگه اېریشسه، «خشم حماسی» عملیاتی یکونلنیشینی، عکس حالده بامباردمانلر ینه باشلنیشینی ایتدی.
ترامپ بوگون (چهارشنبه، ۱۶-ثور) تروثسوشیال ترماغیده یازگن پیامیده «اگر ایران کېلیشیلگن شرطلرگه راضی بۉلسه- بو، البته، کتّه تخمین،«خشم حماسی» عملیاتی یکونلنهدی دېگن.»
اونینگ قۉشیمچه قیلیشیچه، بو حالده هرمز بۉغازی همه اوچون، جملهدن ایران اوچون هم آچیق بۉلهدی.
شونینگدېک، ترامپ آگاهلنتیریب، اگر ایران راضی بۉلمهسه، «بامباردمانلر باشلنهدی و افسوسکی، اوّلگیدن هم انچه یوقاری درجه و کوچ بیلن دوام اېتهدی»، دېدی.
بوگون رویترز پاکستاندهگی منبعلرگه تهیهنیب خبر بېریشیچه، ایران و امریکا کېلیشووگه یقینلشگن و اوروشنی توگهتیش بۉییچه بیر صحیفهلیک حجتنی امضالش عرفهسیده توریبدی.
امریکانینگ ایرانگه قرشی«خشم حماسی» عملیاتی آلتی هفته دوام اېتگن بۉلیب، اونده امریکا و اسرایل قۉشمه هجوملر آرقهلی راکت شهرلری، یېتکچیلر، حربي قوماندانلر، انرژی منبعلری و تاسیساتلرنی نشانگه آلگن.
شوندن سۉنگ پاکستان واسطهچیلیگیده ضعیف صلح اۉرنهتیلگن، بیراق ایران تامانیدن هرمز بۉغازینینگ یاپیب قۉییلیشی و امریکا تامانیدن دېنگیز قملی دوام اېتهیاتگنی سببلی کېسکینلیک درجهسی هنوز یوقاری بۉلیب قالماقده.
