ایرانده خاتم الانبیا مرکزی قرارگاهی قوماندانی علی عبداللهی امریکا جمهور رییسی دونالد ترامپنینگ یقینده بیلدیرگن بیاناتیگه عکس العمل کۉرسهتیب «هر قندهی خارجی قوراللی کوچ، اینیقسه اقش باسقینچی اردوسی اگر هرمز بۉغازیگه یقینلشیش یاکه کیریش نیتیده بۉلسه، هجومگه اوچرهیدی، دېب ایتگن.
صدا و سیما گزارشیگه کۉره، خاتم الانبیا قوماندانی شونینگدېک، برچه تجارت کېمهلری و نفت تانکرلریگه آگاهلنتیریش بېرگن: اولر هرمز بۉغازیده حرکتلنیشده ایران قوراللی کوچلری بیلن موافقلشمسدن هر قندهی یوریشدن سقلنیشلری کېرهک، عکس حالده اولرنینگ خوفسیزلیگی کفالتلنمهیدی.
اونینگ تأکیدلشیچه، هرمز بۉغازی خوفسیزلیگی ایران قوراللی کوچلری نظارتیده بۉلیب، هر قندهی اۉتیش فقط اوشبو کوچلر بیلن کېلیشیلگن حالده عملگه آشیریلهدی.
قومانداننینگ سۉزلریگه کۉره، امریکانینگ «تجاوزکار حرکتی» موجود وضعیتنی ینه-ده مرکّبلشتیرهدی و بو حدوددهگی کېمهلر خوفسیزلیگینی جدّي خوف آستیگه قۉیهدی.
امریکا جمهور رییسی دونالد ترامپ کېچه امریکا بوگوندن باشلب هرمز بۉغازیده قالیب کېتگن کېمهلرنینگ اۉتیشی اوچون چارهلر کۉریشینی معلوم قیلگن اېدی.
اونینگ ایتیشیچه، بو کېمهلر یقین شرق اوروشیگه علاقهسی بۉلمهگن دولتلرگه تېگیشلی بۉلیب، اولر فقط وضعیت قربانلریگه ایلنگن. ترامپ بو تشبثنی «آزادلیک لایحهسی» دېب اتهگن و اونی امریکا یقین شرق دولتلری همده اینیقسه ایران تامانیدن عملگه آشیریلهیاتگن «انسانپرورلیک حرکتی» صفتیده تعریفلهگن.
اوروش باشلنگنیدن بېری مینگلب کېمهلر هرمز بۉغازیده قالیب کېتگن.
ایران اوروش باشلنگنیدن سۉنگ اوشبو سوو یۉلینی یاپگن و آگاهلنتیرگن: اگر کېمهلر قوراللی کوچلر بیلن کېلیشمسدن حرکت قیلسه، اولر نشانگه آلینهدی. دنیا نفت و گازینینگ تخمیناً 20 فایزی اۉتهدیگن هرمز بۉغازینینگ یاپیلیشی نفت نرخلری نینگ کېسکین آشیشیگه آلیب کېلگن و کۉپلب دولتلرده انرژی بحرانینی کوچهیتیرگن.
