امریکا کانگرسیدهگی ییغیلیشده آدام اسمیت سوالیگه جوابا پنتاگوننینگ یوقاری مرتبهلی رسميسی امریکانینگ ایران بیلن اوروشگه حاضرگچه تخمیناً۲۵ میلیارد دالر صرفلهگنینی تصدیقلهدی.
رویترز خبریگه کۉره، اوشبو بیانات دونالد ترامپ تامانیدن حربي بودجهنی آشیریش بۉییچه سۉراونی حمایه قیلیش مقصدیده اۉتکزیلگن کانگرس ییغیلیشی چاغیده ینگرهگن.
ییغیلیش دوامیده نمایندهلر مجلسینینگ مدافعه کمیتهسی اعضاسی بۉلگن دموکرات آدام اسمیت پنتاگون وکیللریدن ایران بیلن اوروشنینگ عمومي خرجتلری حقیده سۉرهگن.
خبرگه کۉره، پنتاگوننینگ مالی نظارتچیسی جولز هرست اوشبو سوالگه جوابا: «تخمیناً۲۵ میلیارد دالر، و بو مبلغنینگ کتّه قِسمی اۉق-داریلر خریدیگه صرفلنگن»، دېگن.
شوندن سۉنگ آدام اسمیت: «بو سوالگه جواب بېر گنینگیزدن خورسندمن، چونکه بیز انچهدن بېری بو سوالنی بېریب کېلهیهپمیز و هېچ کیم بیزگه انیق رقم بېرمهگن اېدی دېگن.»
رویترزنینگ یازیشیچه، ییغیلیشده امریکا مدافعه وزیری پیت هگست هم اشتراک اېتیب، ایراننینگ هستوي قورالگه اېگه بۉلیشینینگ آلدینی آلیش امریکا اوچون اوستوار مقصد اېکنینی تأکیدلهگن و شو نقطهی نظردن اوشبو خرجتلر اۉزینی آقلشینی بیلدیرگن.
بو امریکا رسميلری تامانیدن ایران بیلن اوروش خرجتلری بۉییچه تقدیم اېتیلگن ایلک رسمي رقم حسابلنهدی.
بوندن اوّل امریکا سنا مجلسیدهگی دموکرات اعضا چاک شومر بو اوروش امریکا۴۴ میلیارد دالرگه توشگنینی ایتگن و بو حالت یاقیلغی نرخی نینگ۴ دالرگه آشیشیگه سبب بۉلگنینی بیلدیرگن.
امریکا و اسرایلنینگ ایران بیلن اوروشی امریکا ایچیده، اینیقسه دموکراتلر تامانیدن کېسکین تنقیدلرگه سبب بۉلگن. بو اېسه دونالد ترامپنینگ آرهلیق سیلاولر عرفهسیده محبوبیتی نینگ پهسهییشیگه آلیب کېلگنی ایتیلماقده.
