«آکسیوس» یېتکرمهسینینگ خبریگه کۉره، امریکانینگ بیر رسمي نمایندهسی ایکّی منبعگه تهیهنیب، ایران امریکاگه اوروشنی توگهتیش بۉییچه ینگی پیشنهادنی پاکستان آرقهلی یېتکزگن.
بو تکلیفگه بناءً، ایران اوروش تۉختهتیلیشی عوضیگه هرمز بۉغازینی آچیشگه راضی بۉلیشینی بیلدیرگن.
شونینگدېک، «آکسیوس» نینگ یازیشیچه، ایران اۉز هستوي دستوری بۉییچه مذاکرهلرنی وقتینچه کېچیکتیریشنی هم پیشنهاد قیلگن.
ینگی پیشنهادگه کۉره، اساسي اعتبار اوّلا هرمز بۉغازیدهگی بحراننی حل قیلیش و ایران دېنگیز قملینی توگهتیشگه قرهتیلیشی کېرهک. هسته مذاکرهلری اېسه فقط کېینگی باسقیچده، بۉغاز آچیلگچ و قمل بېکار قیلینگچ باشلنیشی کېرهک بۉلهدی.
«آکسیوس» یېتکرمهسینینگ تأکیدلشیچه، عباس عراقچی اوشبو رېجه حقیده پاکستان، مصر، تورکيه و قطر کبی واسطهچیلرگه توشونتیریش بېرگن و ایران یوقاری رهبریتیده امریکا طلبلریگه جواب بېریش بارهسیده یگانه فکر یۉقلیگینی هم بیلدیرگن.
امریکا اېسه ایراننی کمیده۱۰ ییل دوامیده یورانیومنی باییتیشنی تۉختهتیش و باییتیلگن یورانیوم ذخیرهلرینی مملکتدن چیقریشنی طلب قیلماقده.
«آکسیوس»نینگ یازیشیچه، امریکا اوشبو پیشنهادنی قبول قیلگن، بیراق اونی کۉریب چیقیشگه تیارمی-یۉقلیگی حاضرچه نامعلوم.
بو پیشنهاد احتمال اسلام آبادگه عراقچینینگ سۉنگگی تشریفی چاغیده ایلگری سوریلگن. او تشریف دوامیده پاکستان اوردوسی قوماندانی عاصم منیر و باش وزیر شهباز شریف بیلن اوچرهشگن.
کېینچهلیک او عمانگه باریب، او مملکت سلطانی همده تشقی ایشلر وزیری بیلن مذاکرهلر اۉتکزگن، سۉنگ ینه اسلام آبادگه قَیتیب قۉشیمچه اوچرهشوولر قیلگن و اوندن کېین روسيهگه یۉل آلگن.
«آکسیوس» نینگ قۉشیمچه قیلیشیچه، پاکستان حربيلری و تشقی ایشلر وزیرلیگی بو ینگی تکلیف بۉییچه ایضاح بېریشدن باش تارتگن، ایران رسميلری اېسه حاضرچه اونی رسماً تصدیقلهمهگن.
