امریکا جمهور رییسی دونالد ترامپ ایران بیلن اۉت آچیشنی تۉختهتیش مدتی یکونیگه یقینلشر اېکن، بو صلحنی اوزهیتیرمسلیگینی ایتدی.
ترومپ «سیانبیسی» بېرگن صحبتیده، مذاکرهلر تینچلیک کېلیشوویگه آلیب کېلیشی اوچون صلحنی اوزهیتیرهسیزمی دېگن سوالگه: «بونی قیلیشنی خواهلهمهیمن»، دېب جواب بېردی.
اېران و امریکا اۉرتهسیده پاکستان واسطهچیلیگیده اۉرنهتیلگن ایکّی هفتهلیک صلح اېرتهگه تانگده یکونلنهدی و حاضرچه اونی اوزهیتیریش بۉییچه هېچ قندهی بېلگی یۉق.
شو بیلن بیرگه، تامانلر اۉرتهسیده مذاکرهلرنینگ ایکّینچی باسقیچینی اسلام آباد ده اۉتکزیش بۉییچه اورینیشلر دوام اېتماقده. خبرلرگه کۉره، امریکا هیئتی اېرتهگه اېرتهلب اسلام آبادگه یېتیب کېلهدی، بیراق ایران حلی بو مذاکرهلرده اشتراک اېتیشینی تصدیقلهمهگن.
دونالد ترامپ شونینگدېک، امریکا آخر-عاقبت ایران بیلن «عجایب کېلیشوو»گه اېریشیشینی ایتیب، ایران نینگ امریکا بیلن کېلیشیشدن «باشقه چارهسی یۉق»لیگینی تأکیدلهدی.
او ینه امریکا ایراننینگ دېنگیز و هوا کوچلرینی یۉق قیلگنی همده مملکت رهبرلرینی اۉلدیرگنینی دعوا قیلدی.
اونینگ سۉزلریگه کۉره: «آچیغینی ایتسهم، بیز اولرنینگ رهبرلرینی یۉق قیلدیک. بو بیر تاماندن وضعیتنی مرکّبلشتیرهدی، لېکن بو رهبرلر انچه منطقلیراق. بو رژیم اۉزگریشی، قندهی نام بېریشینگیزدن قطع نظر. مېن بونی قیلهمن دېب ایتمهگنمن، لېکن اونی بالواسطه عملگه آشیردیم.»
دونالد ترامپ اوّل هم بیر نېچه بار ایرانده رژیم اۉزگریشی یوز بېرگنینی و حاضرگی رهبرلر کمراق رادیکال اېکنینی دعوا قیلگن اېدی.
اما علی خامنهای اۉلدیریلگنیدن سۉنگ، ایران مجتتبی خامنهای نی ینگی رهبر صفتیده بېلگیلهگن. مملکت رسميلری اېسه سیاسي تیزیم علیحده شخصلرگه باغلیق اېمسلیگینی تأکیدلشماقده.
