ایران پارلمانی باشلیغی و مذاکرهچی هیئت رییسی محمدباقر قالیباف، مملکت تهدید سایهسیده مذاکرهنی قبول قیلمسلیگینی و جنگ میدانیگه تیار اېکنینی ایتدی.
اېران پارلمانی رییسی ایکس اجتماعی ترماغیده یازیشیچه، دونالد ترامپ قمل اعلان قیلیب و اۉت آچیشنی تۉختهتیش کېلیشووینی بوزیب، اۉزیچه مذاکره چوکینی «تسلیم بۉلیش چوکی»گه ایلنتیرماقچی یاکه ینه اوروشنی آقلهماقچی.
اونینگ ینه قۉشیمچه قیلیشیچه: «تهدید سایهسیده مذاکرهنی قبول قیلمهیمیز و سۉنگگی ایکّی هفته ایچیده جنگ میدانیده ینگی کارتلرنی آچیشگه تیارلندیک.»
بو بیاناتلر دونالد ترامپ امریکا هیئتیگه باشچیلیک قیلیب، اونینگ جمهور رئیس اۉرین باسریی جیدی ونس ایران بیلن مذاکرهلرنینگ ایکّینچی باسقیچی اوچون اسلام آبادگه باریشینی ایتگن بیر پیتده ینگرهماقده.
ایران رسميلری حاضرگچه مذاکرهلرنینگ ایکّینچی باسقیچیده قتنهشیشگه تیار اېکنینی اعلان قیلمهگن.
رویترز خبریگه کۉره، مسعود پزشکیان شهباز شریفگه مذاکرهلرده واسطهچیلیک قیلهیاتگن شخصگه، اگر امریکا تامانیدن دېنگیز قملی دوام اېتسه، ایران هیئتی اسلام آبادگه بارمسلیگینی ایتگن.
شونینگدېک، رویترز پاکستان حربي منبعسیگه تهیهنیب خبر بېریشیچه، عاصم منیر دونالد ترامپ بیلن صحبتده ایران بندرلریگه قۉییلگن دېنگیز قملی مذاکرهلرگه تۉسقینلیک قیلهیاتگنینی بیلدیرگن و ترامپ بو مسألهنی کۉریب چیقیشینی ایتگن.
شونگه قرهمهی، دونالد ترامپ آچیق بیاناتلریده ایران بیلن کېلیشووگه اېریشیلمهگونچه دېنگیز قملی بېکار قیلینمسلیگینی تأکیدلهگن.
امریکا اۉتگن هفته نینگ دوشنبه کونیدن باشلب ایران بندرلرینی قمل آستیگه آلگن و یقینده اوشبو مملکتگه تېگیشلی بیر یوک کېمهسینی هم قۉلگه آلگن.
