امریکا جمهور رییسی دونالد ترامپ، «نیویورک پُست»گه بېرگن صحبتیده مملکت مذاکره هیئتی جیدی ونس باشچیلیگیده ایران بیلن مذاکرهلر اوچون بوگون کېچقورون (دوشنبه، ۳۱-حمل) اسلام آبادگه یېتیب باریشینی ایتدی.
ترامپ اوشبو صحبتیده مذاکرهلر اۉتکزیلمسلیگی حقیدهگی شبههلرنی رد اېتیب: «بیز مذاکرهلر اۉتکزهمیز. دېمک، حاضر هېچ کیم اۉیین قیلمهیپتی،» دېدی.
امریکا جمهور رییسی، اگر مذاکرهلرده ایجابي سیلجیش بۉلسه، ایراننینگ یوقاری مرتبهلی رهبرلری بیلن اوچرهشیشگه هم تیار اېکنینی بیلدیردی.
شو بیلن بیرگه، ایران حاضرگچه اسلام آبادده اۉتکزیلیشی کوتیلهیاتگن مذاکرهلرنینگ ایکّینچی باسقیچیده اشتراک اېتیشینی تصدیقلهمهگن.
ایران تشقی ایشلر وزیرلیگینینگ سۉزلاوچیسی اسماعیل بقایی، بوگون مطبوعات انجمنیده ایران حاضرچه امریکا بیلن ایکّینچی باسقیچ مذاکرهلریده قتنهشیش بۉییچه رېجه توزمهگنینی و بو بارهده قرار قبول قیلینمهگنینی ایتدی.
شو بیلن بیرگه، رویترز خبریگه کۉره، ایران جمهور رییسی مسعود پزشکیان تیلفون آرقهلی پاکستان باش وزیری شهباز شریف بیلن صحبتده امریکا تامانیدن ایراننینگ دېنگیزدن قمل قیلینیشینی تۉختهتیشنی طلب قیلگن. او، اگر بو قمل بېکار قیلینمسه، ایران مذاکره هیئتی پاکستانگه بارمسلیگینی هم تأکیدلهگن.
