ایران تشقی ایشلر وزیرلیگی سۉزلاوچیسی اسماعیل بقایی امریکا جمهور رییسی دونالد ترامپ، بیاناتلریگه مناسبت بیلدیریب، ایراننینگ باییتیلگن یورانیومی هېچ قهیېرگه کۉچیریلمسلیگینی ایتدی.
او ایران دولت تلویزیونی بیلن صحبتده باییتیلگن یورانیومنی امریکاگه اۉتکزیش هېچ قچان ایران تامانیدن وریانت صفتیده کۉریب چیقیلمهگنینی تأکیدلهدی.
امریکا جمهور رییسی دونالد ترامپ اېسه کېچه رویترز بیلن تېلفون آرقهلی صحبتده امریکا ایران بیلن همکارلیکده اونینگ باییتیلگن یورانیومینی قَیته ایشلشی و اونی امریکاگه آلیب اۉتیشینی ادعا قیلگن اېدی.
او شونینگدېک اۉزینینگ تروثسوشیال اجتماعي ترماغیدهگی پُستیده امریکا ایراننینگ برچه «هسته چنگی»نی هېچ قندهی تۉلاوسیز آلیشینی یازگن.
امریکا جمهور رییسی اۉتگن ییلی بی-2 بامباردمانچی اوچاقلری آرقهلی ایران هسته انشااتلریگه قیلینگن هجوملرگه اشاره قیلیب، اوشبو مملکتنینگ باییتیلگن یورانیومینی «هسته چنگی» دېب اتهگن.
خلقارا اتم انرژیسی اگېنتلیگی گزارشیگه کۉره، اسران تخمیناً ۴۰۰-۴۵۰ کیلوگرام۶۰ فایزلیک باییتیلگن یورانیومگه اېگه بۉلیب، بو تخنیکي جهتدن قورال درجهسیگه جوده یقین حسابلنهدی.
امریکا و ایران اۉرتهسیدهگی مذاکرهلر آرتیدن اوشبو مقداردهگی یورانیوم نینگ تقدیری حقیده، جملهدن اونی ایران تشقریسیگه کۉچیریش وریانتی بارهسیده تورلی خبرلر ترقهلگن، بیراق ایران بو خبرلرنینگ هېچ بیرینی تصدیقلهمهگن.
