عمان تشقی ایشلر وزیری بدر البوسعیدینینگ ایتیشیچه، مملکتی هرمز آرقهلی کېمهلر و نفت تانکرلرینینگ خوفسیز اۉتیشینی تأمینلش اوچون جدّي حرکت قیلماقده.
او بوگون (دوشنبه،۳ حوت) ایکس اجتماعی ترماغیده بو حقده معلوم قیلیب یازیشیچه: «سیزنینگ ایران حقیدهگی قرهشینگیز قندهی بۉلیشیدن قطع نظر، بو اوروش اولر تامانیدن باشلنمهگن. بو حالت الّهقچان کېنگ اقتصادي معمالرنی کېلتیریب چیقردی و اگر اوروش دوام اېتسه، وضعیت ینهده یامانلشیشیدن خواطردهمن.»
بو بیانات دونالد ترامپ امریکا و ایران اۉرتهسیده ایجابی ملاقات بۉلهیاتگنینی ایتیب، ایران انرژی مرکزلریگه ضربه بېریش مدتینی کېچیکتیرگنینی بیلدیرگنیدن سۉنگ ینگرهدی.
ایران حاضرچه امریکا بیلن مذاکرهلرنی رسماً تصدیقلهمهگن.
امریکا و اسرایلنینگ ایرانگه قرشی اوروشی باشلنگنیدن بېری، هرمز بۉغازی آرقهلی کېمهلر حرکتی سېزیلرلی درجهده کمهیگن و بونینگ آرتیدن گلوبل نفت نرخلری آشگن.
اولراق ترامپ ایرانگه۴۸ ساعت مهلت بېریب، بۉغازنی تۉلیق و تهدیدسیز آچیشنی طلب قیلگن، عکس حالده انرژی تاسیساتلرگه ضربه بېریلیشینی ایتگن اېدی.
ایران اېسه بونگه جوابن، اگر اونینگ اۉبژېکتلری نشانگه آلینسه، اسرایلنینگ الکتر ترماقلری و منطقهدهگی اَیریم انرژی مرکزلریگه ضربه بېریشینی بیلدیرگن.
کېینراق ترامپ سۉنگگی ایکّی کون ایچیده امریکا و ایران اۉرتهسیده مذاکرهلر بۉلگنینی ایتیب، شو سببلی ایران انرژی ستشنلریگه ضربه بېریشنی بېش کونگه کېچیکتیریشگه بویروق بېرگنینی معلوم قیلگن.
