فرانسه جمهور رییسی امانوئل مکروننینگ ایتیشیچه، امریکا و اسرائیلنینگ ایران بیلن بۉلهدیگن اوروشی خلق ارا تینچلیک و خوفسیزلیک اوچون جوده آغیر عاقبتلرگه سبب بۉلهدی.
فرانسه جمهور رییسی بوگون (شنبه ۹ حوت) ایکس اجتماعي ترماغیده یازیشیچه، دوام اېتهیاتگن کېسکینلیکنینگ کوچهییشی برچهگه خوفلی اېکنینی و بو جریان تۉختهتیلیشی لازملیگینی تأکیدلهگن.
او شوندهی دېگن: «ایران رژیمی حاضر هسته و بالیستیک دستورلرینی، شونینگدېک، منطقهنی بېقرارلشتیرووچی فعالیتلرینی توگهتیش اوچون حلال نیت بیلن مذاکرهلرگه کیریشیشدن باشقه یۉلی یۉقلیگینی توشونیشی کېرهک. بو یقین شرقدهگی برچهنینگ خوفسیزلیگی اوچون مطلقا ضرور»
مکرون «اېران خلقی هم اۉز کېلهجگینی اېرکین روشده قوریش امکانیگه اېگه بۉلیشی کېرهک. اسلامي رژیم تامانیدن عملگه آشیریلگن قیرغینلر اونی لېگیتیملیکدن محروم قیلدی و آواز خلقنینگ اۉزیگه قَیتریلیشینی تقاضا اېتهدی.»
او شونینگدېک، فرانسه اۉز تمایللریگه صادق قالگن حالده و خلق ارا مسوولیتینی انگلهگن حالده، بیرلشگن ملتلر تشکیلاتی خوفسیزلیک کېنگشینینگ زودلیک بیلن ییغیلیشینی طلب قیلگنینی قۉشیمچه قیلگن.
فرانسه جمهور رییسی شونینگدېک، اروپادهگی همکارلری و یقین شرقدهگی دۉستلری بیلن یقین علاقهده اېکنینی بیلدیرگن.
بوگون اېرتهلب امریکا و اسرائیل ایران حدودیگه قرشی کېنگ کۉلملی هجوملرنی باشلهدی و مملکتنینگ تورلی شهرلریدهگی نشانلرنی ضربهگه آلدی.
ایران اېسه بو هجوملرگه جوابن اسرائیل شهرلریگه همده منطقهدهگی امریکا حربی قرارگاهلریگه قرشی راکت و درون هجوملرینی باشلهگن.
