تورکيه نینگ ایچکی ایشلر وزیری علی یرلیکایا داعش گروهیگه اعضالیکده گمانلنیب۳۵۷ کیشی حبسگه آلینگنی حقیده معلوم قیلدی.
تورکيه ایچکی ایشلر وزیری ایکس اجتماعي ترماغیده یازیشیچه، اوشبو شخصلر بوگون اېرتهلب (سهشنبه، ۹جدی) مملکت نینگ 21 ولایتیده اۉتکزیلگن بیر وقت نینگ اۉزیدهگی عملیاتلر دوامیده قۉلگه آلینگن.
اونینگ قۉشیمچه قیلیشیچه، عملیاتلر ایستانبول، انقره، انتالیا، قونيه و یالوا شهرلریده هم اۉتکزیلگن.
تورکيه ایچکی ایشلر وزیرینینگ تأکیدلشیچه، حاضرگچه تروریزمگه مملکتنی تیز چۉکتیریشگه یۉل قۉیمهگنلریدېک، کېلهجکده هم بونگه امکان بېرمهیدیلر.
اوشبو عملیاتلر یالوا شهریده داعش اعضالیگیده گمان قیلینگن شخصلر بیلن بۉلگن تۉقنهشووده اوچ نفر تورک پولیس خادمی هلاک بۉلیب، سکّیز نفر پولیسچی و بیر نفر خوفسیزلیک خادمی یرهلنگنیدن بیر کون اۉتیب اۉتکزیلدی.
سکّیز ساعت دوام اېتگن اوشبو تۉقنهشووده داعش اعضالیگیده گمان قیلینگن آلتی نفر قوراللی شخص هم اۉلدیریلگن.
تخمیناً بیر هفته آلدین هم تورکيه رسميلری داعش اعضالیگیده گمان قیلینیب۱۱۵ کیشی حبسگه آلینگنینی اعلان قیلگن اېدی.
رسميلرنینگ ایتیشیچه، بو شخصلر کرسمس و ینگی ییل بیرهملری وقتیده غیرِ دینلرگه هجوم قیلیشنی رېجهلشتیرگن.
