افغانستان وطنداشینینگ امریکا ملي گارد ایکّی اعضاسیگه هجومی آرتیدن، امریکا قۉشمه ایالتلرینینگ تشقی ایشلر وزیرلیگی افغانستان پاسپورتی بیلن سیاحت قیلهیاتگن شخصلر اوچون ویزهلرنی بېریشنی تۉختهتدی.
وزیرلیک بوگون (شنبه،۸ قوس) ایکس اجتماعی صحیفهسیده، «وزیرلیک امریکانینگ ملي خوفسیزلیگی و جماعت خوفسیزلیگینی تأمینلش اوچون برچه ضرور چارهلرنی کۉرهدی» دېب یازدی.
امریکا تشقی ایشلر وزیری مارکو روبیو هم شونگه اۉخشش بیاناتیده، امریکا خلقینی و یشاووچیلرینی حمایه قیلیشدن اوستونراق مقصد یۉقلیگینی تأکیدلهدی.
آلدینراق ترامپ دولتی افغانستان وطنداشلرینینگ امریکا قۉشمه ایالتلریگه کیریشیگه چېکلاولر قۉیگن اېدی.
چېکلاولر کوچهییشی، اۉتگن هفته واشنگتن دیسی شهریده، آق اوی یقینیده افغانستان بیر یشاووچیسی ایکّی ملي گارد اعضاسیگه اۉق اوزگن و اولرنی آغیر جراحتلهگنیدن کېین یوز بېردی. یرهلنگنلردن بیری شفاخانهده وفات اېتدی.
هجومنی عملگه آشیرگن رحمانالله لکنوال ۲۹ یاشیده بۉلیب، ایلگری امریکا استخبارات تشکیلاتی (سیا) بیلن همکارلیک قیلگن و۲۰۱۲ییل سپتامبر، افغانستان طالبان نظارتیگه اۉتگنیدن سۉنگ، امریکاگه آلیب کېلینگن.
اوشبو هجوم کېنگ جماعتچیلیکنینگ ناراضیلیگیگه سبب بۉلدی.
امریکا قۉشمه ایالتلرینینگ جمهور رییسی دونالد ترامپ افغانستان برچه یشاووچیلرینینگ عریضهلرینی تېکشیریش بۉییچه کۉرستمه بېردی.
امریکا شهروندلیک و مهاجرت بۉییچه خدمت ادارهسی افغانستان وطنداشلرینینگ مهاجرت عریضهلرینی کۉریب چیقیشنی تۉختهتگنینی اعلان قیلدی.
