پاکستان تشقی ایشلر وزیرلیگی امریکانینگ واشنگتن دیسی شهریده بیر افغانستانلیک تامانیدن ملي گارد اعضالریگه قرهته اۉق اوزیلگن واقعه یوزهسیدن مناسبت بیلدیریب، اوشبو هجومنی «جهان مقیاسیده تروریزم نینگ خواطرلی طرزده قَیته جانلنیشی نینگ بېلگیسی» دېب اتهدی.
وزیرلیک جمعه کونی اعلان قیلگن بیاناتیده هجومنی قارهلب، قربانلرنینگ عایلهلریگه، امریکا حکومتی و خلقیگه همدردلیک بیلدیردی.
بیاناتده ایتیلیشیچه: «اوشبو مقصدلی هجوم شبههسیز ترورچیلیک حرکت بۉلیب، امریکا توپراغیده قۉپال هجومدیر. سۉنگگی ییگیرمه ییل ایچیده پاکستان افغانستان بیلن باغلیق شونگه اۉخشش کۉپلب ترورچیلیک حادثهلرنی باشیدن کېچیردی.»
اۉتگن چهارشنبه کونی بیر افغانستان وطنداشی واشنگتن دیسی شهریده آق اوی یقینیده امریکا ملي گارد ایکّی اعضاسیگه اۉق اوزگن و اولرنی آغیر جراحتلهگن. جراحتلنگنلردن بیری کېینچهلیک شفاخانهده وفات اېتدی.
هجومنی عملگه آشیرگن رحمانالله لکنوال۲۹ یاشده بۉلیب، ایلگری امریکا قۉشمه ایالتلری استخبارات تشکیلاتی (سیا) بیلن همکارلیک قیلگن و ۲۰۲۱ ییل سپتامبرده، افغانستاننینگ طالبان قۉلیگه اۉتگنیدن سۉنگ، امریکاگه آلیب کېلینگن.
امریکا رسميلری هجومنی ترورچیلیک حرکت صفتیده تېرگاو قیلهیاتگنینی معلوم قیلگن.
پاکستان تشقی ایشلر وزیرلیگی بیاناتیده دوام اېتیب، «اوشبو حادثه فراملی تروریزم بیلن باغلیق معمالرگه اعتبار قرهتهدی و اوشبو تهدیدلرگه قرشی گلابل همکارلیکنی کوچهیتیریش ضرورتینی کۉرسهتهدی» دېب یازگن.
شونینگدېک وزیرلیک بیاناتیده «اوشبو واقعه جهان مقیاسیده تروریزم نینگ خواطرلی قَیته جانلنیشینی کۉرسهتهدی. خلقارا همجعیت بو مسألهگه اعتبار قرهتیشی و تروریزمگه قرشی عمومي سعی-حرکتلرنی کوچهیتیریشی لازم» دېییلهدی.
پاکستان تشقی ایشلر وزیرلیگی اوشبو مملکت امریکا و خلقارا همجعیت بیلن تروریزمگه قرشی عمومي کورهشیشده همکارلیک قیلیشگه صادق اېکنینی تأکیدلهگن.
پاکستان رسميلری طالبان افغانستانده حاکمیتنی قۉلگه کیریتگنیدن کېین مملکتده بېقرارلیک کوچهیگنینی بیلدیرهدی. اولر افغانستاندن پاکستانگه تروریزم ترقهلیشینی تۉختهتیش ضرورلیگینی تأکیدلهیدی. شو بیلن بیرگه، کۉپلب افغانستان وطنداشی و سیاستچیلری حاضرگی وضعیتنی پاکستان سیاستی نینگ نتیجهسی دېب حسابلهیدی. اوشبو سیاستچیلرنینگ ایتیشیچه، افغانستان تروریزم و اېکسترېمیزمنی قۉللب-قوّتلش بیلن باغلیق معمالرنینگ قربانی بۉلگن.
