امریکا قۉشمه ایالتلرینینگ ملی گارد ایکّی اعضاسیگه بیر افغانستانلیک شخص تامانیدن هجوم اویوشتیریلگنیدن سۉنگ، امریکا جمهور رییسی دونالد ترامپ بوتون «اوچینچی دنیا مملکتلری»دن قۉشمه ایالتلرگه مهاجرتی پروندهسینی تۉختهتیشینی ایتدی.
ترامپ «شکرگزارلیک» کونی مناسبتی بیلن قیلگن نطقیده بو چارهنی «امریکا تیزیمینی یخشیلش اوچون» عملگه آشیرهیاتگنینی تأکیدلهدی.
او، شونینگدېک، بایدن مأموریتی تامانیدن عملگه آشیریلگن میلیونلب «قانونسیز قبول قیلیش» جریانیگه برهم بېریشینی و امریکانینگ ایچکی تینچینی ضعیفلشتیرهدیگن مهاجرلرنینگ وطنداشلیگینی بېکار قیلینیشینی ایتدی.
ترامپنینگ سۉزلریگه کۉره، مالیوي یوک بۉلهیاتگن، خوفسیزلیک تهدیدی توغدیرهدیگن یاکه «غرب تمدنی بیلن ماس کېلمهیدیگن» هر قندهی چېت اېلّیک هم چیقریب یوباریلهدی.
چهارشنبه آقشامی افغانستان وطنداشی رحمانالله لکنوال واشنگتندهگی آق اوی یقینیده امریکا ملي گاردینینگ ایکّی اعضاسیگه اۉق اوزیب، اولرنی آغیر یرهلنتیرگن اېدی.
ترامپ بوگون اېرتهلب سارا بکستورم یرهلنگنلردن بیری وفات اېتگنینی، ینه بیر نفر نینگ احوالی اېسه اۉته آغیر اېکنینی اعلان قیلدی.
اوشبو هجوم آرتیدن ترامپ برچه افغانستانلیکلرنینگ یشش حقوقینی قَیته کۉریب چیقیش بۉییچه بویروق بېرگن.
شونینگدېک، جمهور رییس افغانستانلیکلر و ینه بیر قطار دولتلرنینگ وطنداشلری اوچون بېریلگن «گرین کارت»لرنی هم قَیته کۉریب چیقیشنی بویورگن.
امریکا فدرال پولیسی بو هجومنی ترورچیلیک حرکت صفتیده تېکشیرماقده و لکنوالگه تېگیشلی لپتاپ، تیلفون، آیپد و باشقه الکترون اوسکونهلرنی قۉلگه کیریتگنینی بیلدیرگن.
