کویت تشقی ایشلر وزیرلیگی ایران هجوملریگه جوابن اوشبو مملکت اېلچیخانهسینینگ ایکّی ایشلاوچیسینی «نا مطلوب عنصر» دېب اعلان قیلدی و اولر نینگ ۲۴ ساعت ایچیده کویتنی ترک اېتیشینی طلب قیلدی.
وزیرلیک بوگون(چارشنبه، ۱۳ جوزا) ترقهتگن بیاناتیده تشقی ایشلر وزیری اۉرینباسری حامد حمید یعقوبیفر، ایران اېلچیخانهسی نینگ مؤقت ایشلر وکیلینی چقیریب، تهراننینگ دوام اېتهیاتگن هجوملری یوزهسیدن رسمي ناراضیلیک اعتراضینی تاپشیرگنینی معلوم قیلدی.
کویت تشقی ایشلر وزیرلیگی، شونینگدېک، ایران اېلچیخانهسی خادملری سانینی قیسقرتیریش همده دیپلوماتیک ماموریتنینگ ایکّی اعضاسینی «نا مطلوب عنصر» دېب اعلان قیلیش تۉغریسیدهگی قرار هم ایران وکیلیگه یېتکزیلگنینی بیلدیردی.
معلوماتلرگه کۉره، بوگون تانگده ایران سپاه پاسداران کوچلری امریکانینگ ایران نفت تانکریگه هرمزده و قېشم آرالیدهگی علاقه انشااتیگه اویوشتیریلگن هجوملریگه جوابن، امریکا حربي-دېنگیز کوچلرینینگ بحریندهگی بېشینچی فلوتیگه همده کویتدهگی اَیریم نشانلرگه ضربه بېرگن.
کویت دولتینینگ معلوم قیلیشیچه، اوشبو هجوملر عاقبتیده غیر نظامی تاسیساتلری، جملهدن کویت خلق ارا قۉنالغهسی هم نشانگه آلینگن. حادثه نتیجهسیده کمیده بیر کیشی هلاک بۉلگن، ینه ۶۳ کیشی یرهلنگن.
