روسيه ینه بیر بار ایراننینگ باییتیلگن یورانیومینی آلیب چیقیشگه تیار اېکنینی بیلدیردی.
روسيه تشقی ایشلر وزیرلیگینینگ سۉزلاوچیسی ماریا زاخارووا بوگون (پنجشنبه،۷ جوزا) بۉلیب اۉتگن مطبوعات انجمنیده مسکو بو تکلیفنی مجبورلب قبول قیلدیرمسلیگینی ایتدی.
اونینگ سۉزلریگه کۉره، «روسيه ایراننینگ باییتیلگن یورانیومینی آلیب چیقیشده یاردم بېریشگه تیار، بیراق مسکو بو پیشنهادنی مجبورن قبول قیلدیرمهیدی.»
ماریا زاخارووا روسيه بو تکلیفنی بیر نېچه آی آلدین ایلگری سورگنینی، اما واشنگتن حلی اونی قبول قیلمهگنینی ایتدی.
امریکا قۉشمه ایالتلری جمهور رییسی دونالد ترامپ ایراننینگ باییتیلگن یورانیومینی مملکتدن چیقریشنی اۉزینینگ «قیزیل چیزیقلری»دن بیری دېب حسابلهیدی.
اما او شو هفته احتمالي کېلیشوو یکونلنهیاتگنی حقیده گپیرر اېکن، ایراننینگ باییتیلگن یورانیومی امریکاگه کۉچیریلیشی یاکه ایران اسلام جمهوریتی بیلن موافقلشتیریلگن حالده باشقه جایده یۉق قیلینیشی ممکنلیگینی ایتدی.
بوندن اوّل هم مسکو بیر نېچه بار اېراننینگ باییتیلگن یورانیومینی آلیب چیقیش رېجهسینی ایلگری سورگن اېدی.
جملهدن، روسيه جمهور رییسی ولادیمیر پوتین تخمیناً اوچ هفته آلدین ۱۹ ثور مسکودهگی مطبوعات انجمنیده شوندهی دېگن اېدی: «روسيه 2015-ییلده ایراننینگ باییتیلگن یورانیومینی آلیب چیققن و حاضر هم بو تجربهنی تکرارلشگه تیار.»
اونینگ ایتیشیچه، مسکو ماجرانینگ تېزراق توگهشی اوچون ایراننینگ باییتیلگن یورانیومینی روسيهگه کۉچیریش و سقلش مسألهسیده واشنگتن همده تهران بیلن علاقهلرنی دوام اېتتیرهدی.
۲۰۱۵-ییلده ایران و « ۵+۱ گروهی» (امریکا، روسيه، چین، بریتانیا، فرانسه و آلمان) اۉرتهسیده هستوي کېلیشوو برجام یکونلنگچ، تهران باییتیلگن یورانیوم ذخیرهسینی۱۰ مینگ کیلوگرامدن۳۰۰ کیلوگرامگچه کمهیتیریشگه راضی بۉلگن اېدی. شونده ایران نینگ ۸.۵ تاندن۱۱ تُنگچه کم باییتیلگن یورانیومی مسکوگه آلیب چیقیلگن اېدی.
