امریکا قۉشمه ایالتلرینینگ رسميلری ایرانگه قرشی ینگی هجوملر عملگه آشیریلگنینی معلوم قیلیب، بو هجوملرده امریکا کوچلری و هرمز بۉغازیدهگی کېمهچیلیک اوچون تهدید حسابلنگن ایران درونلری نشانگه آلینگنینی ایتدی.
بونگه جوابن، ایران اسلام انقلابی قۉریقچیلری(سپاه پاسداران) مطبوعات خدمتی بوگون تانگده (پنجشنبه، ۷-جوزا) امریکا اوردوسی بندر عباس قۉنالغهسی یقینیدهگی نقطهگه ضربه بېرگنیدن سۉنگ، «تجاوز منبعی» صفتیده امریکانینگ هوا بزهسی نشانگه آلینگنینی بیلدیردی.
سپاه پاسداران بیاناتیده اوشبو بزه جایلشووی حقیده باتفصیل معلومات بېریلمهگن. شو بیلن بیرگه، کویت اوردوسی مملکت هوا مدافعهسی تیزیملری دشمنانه راکت و درون هجوملرینی توتیب قالگنینی معلوم قیلدی. امریکانینگ منطقه دولتلریده، جملهدن کویتده هم حربي بزهلری موجود.
سپاه پاسداران بیاناتیده بو جواب «جدّي آگاهلنتیریش» اېکنی تأکیدلنیب، «دشمن بیلیشی کېرهککی، تجاوز جوابسیز قالمهیدی و تکرارلنسه، جوابیمیز ینهده قطعي بۉلهدی»، دېییلهدی.
بیر نېچه ساعت آلدین رویترز خبرگزارلیگی امریکا رسميسیگه تهیهنیب خبر بېریشیچه، امریکا اوردوسی هرمز بۉغازیدهگی تجارت کېمهلری و امریکالیک حربيلر اوچون تهدید بۉلگن ایران درون اۉبژېکتلریگه قرشی ینگی هجوملر اویوشتیرگن.
رسميگه کۉره، امریکا اوردوسی تۉرتته هجومچی دروننی اوریب توشیرگن همده بندر عباس پورت شهریدهگی بېشینچی دروننی اوچیریش عرفهسیده بۉلگن یېروستی باشقروو ستشنسیگه ضربه بېرگن.
امریکا رسميسی شوندهی دېگن: «بو حرکتلر حساب-کتاب اساسیده، تۉلیق مدافعه مقصدیده و اۉت آچیشنی تۉختهتیش رژیمینی سقلب قالیش اوچون عملگه آشیریلدی.»
اوّلراق ایران دولت عاموی اخبارات واسطهلری هم بندر عباسده پارتلش آوازلری اېشیتیلگنینی خبر قیلگن اېدی.
تسنیم خبرگزارلیگینینگ یازیشیچه، ایران دېنگیز کوچلری امریکالیک نفت تانکېریگه آگاهلنتیرووچی اۉق اوزگنیدن کېین، امریکا اوردوسی بندر عباس اطرافیدهگی «کویگن یېر»گه ضربه بېرگن و حادثهده هېچ قندهی انساني یاکه مالیوي ضرر کوزهتیلمهگن.
مذکور اخباراتگه کۉره، ایران دېنگیز کوچلری هرمز بۉغازیدن اۉتیشگه اورینگن امریکالیک نفت تانکرینی آرتگه قَیتیشگه مجبور قیلگن.
بو حربي حرکتلر ایران و امریکا اۉرتهسیدهگی تینچلیک مذاکرهلری احتیاطکار آپتیمیزم بیلن دوام اېتهیاتگن بیر پیتده یوز بېرماقده.
پاکستان باش وزیری شهباز شریف مذاکرهلرده واسطهچیلیک قیلهیاتگن مملکت رهبری صفتیده، مسعود پزشکيان بیلن صحبتده تینچلیککه قرهتیلگن سعی-حرکتلر یقین آرهده برقرار کېلیشووگه آلیب کېلیشیگه امید بیلدیرگن.
سۉنگّی کونلرده ایران یېتکرمهلری دستلبکی و نارسمي کېلیشوو لایحهسی آلینگنینی خبر قیلگن اېدی، بیراق آق اوی بو معلوماتلرنی رد اېتدی.
امریکا جمهور رییسی دونالد ترامپ هم چهارشنبه کونی وزیرلر محکمهسی ییغیلیشیده ایران بیلن مذاکرهلر «حاضرچه نتیجه بېرمهگنینی» و بو جریاندن قانیقمهیاتگنینی ایتدی.
